Историсĕр, чĕлхесĕр малашлăх çук
Çитес тунтикун, ака уйăхĕн 25-мĕшĕнче, Чăваш чĕлхин кунне паллă тăватпăр. Çак кун Аслă вĕрентекенĕмĕр Иван Яковлев çут тĕнчене килнĕ. Хăйĕн пĕтĕм пурнăçне чăваш халăхне çутта кăларассишĕн тăрăшнăскер ыттисене те çак ырă пархатара малалла тăсма пилленĕ. «Халăх шухăшлавĕ, тĕнчекурăмĕ унăн тăван чĕлхинче палăрать, çавăнпа та тăван чĕлхесĕр ăнăçлă çутĕçĕ те пулма пултараймасть», — тенĕ Иван Яковлев. Кирек хăш халăхăн та тăван чĕлхи, паллă çыннисем пур. Вĕсенчен пысăк пуянлăх çук. Шупашкарта пĕлÿ пухакан ачасем паллă чăвашсене пĕлеççĕ-и?