Archive - Çу 2014 - Хыпар

Чăвашлăх тĕнчишĕн палăрăмлă черетлĕ пулăм хыçа юлчĕ: пĕтĕм халăхпа пĕрле тăван чĕлхепе диктант çыртăмăр. Çакнашкал акцие ирттерес йăла вырăссенчен пуçланчĕ пулин те чăвашсем проектăн пĕлтерĕшне тарăнлатни паха: чи авалхи илемлĕ чĕлхесенчен пĕри шутланакан чĕлхене пулас ăрусене те пехиллес, унăн пуянлăхне упрас, хамăр тăван культурăран писесрен сыхланас тĕллеве тĕпе хунă. Ахальтен мар йĕркелÿçĕсем пĕтĕм чăваш диктантне Чăваш чĕлхи кунĕнче çырма тĕв турĕç.

Ĕнер кăна сцена çинче култарнă пике ĕçре - пач урăх çын. Çитес кунсенче хăш ялти волонтерсемпе мĕн тумаллине пуç тавра çавăрттарнипе пĕрлех сĕтел çинчи тĕрлĕ çыру-хушупа паллашса вĕсене кирлĕ инстанцисене çитерме ĕлкĕрет.

Тунти кун Çĕнĕ Шупашкарти А.Николаев ячĕллĕ тĕп стадионта «Грани» хаçатăн парнисене çĕнсе илессишĕн çăмăл атлетсен эстафети иртнĕ.

Нумай ачаллă çемьесене çĕр лаптăкĕпе тивĕçтерес енĕпе республикăра малалла ĕçлеççĕ. Кăçалхи ака уйăхĕн 28-мĕшĕ тĕлне вырăнти хăй тытăмлăх органĕсенче ăна илес текен 4423 çемье учетра тăнă. Унашкаллисем Шупашкар /1499/, Çĕнĕ Шупашкар /430/ хулисенче тата Шупашкар районĕнче /467/ уйрăмах йышлă.

Республикăра «Çулталăк вĕрентекенĕ» конкурс йăлана кĕчĕ: 1992 çултанпа иртет вăл. Пĕтĕмĕшле пĕлÿ парас ĕçре тăрăшакансен хушшинче чи пултаруллине, лайăххисенчен лайăххине тупма пулăшакан тупăшăвăн пĕлтерĕшĕ - маттуррисене малашне те çитĕнÿсем патне кармашма хавхалантарни. Çавна кура Чăваш Енре педагогсен конкурсĕсем йышлăланчĕç.

Чăваш Ен Пуçлăхĕ Михаил Игнатьев ĕнер ĕç тăвакан влаç, федераци тытăмĕсен вырăнти органĕсен, хула округĕсен ертÿçисемпе канашлу ирттернĕ.

Ял хуçалăх министрĕ Сергей Павлов уй-хирти ĕçсемпе паллаштарнă. Кăçал акакан мĕн пур лаптăк 570 пин гектарпа танлашмалла. Ку пĕлтĕрхинчен 20,7 пин гектар нумайрах - 103,8%. Çу уйăхĕн 5-мĕшĕ тĕлне çурхи тата пăрçа йышши культурăсене 139,7 пин гектар акнă - планланин 67%. Ĕçсем Елчĕк, Патăрьел тата Вăрнар районĕсенче лайăх пыраççĕ.

РФ Спорт министерстви регионсен спортăн тĕп тĕсĕсене çирĕплетнĕ. Ведомство йышăнăвĕпе килĕшÿллĕн Чăваш Енре аталантараканнисен йышне тепĕр виçĕ ене кĕртнĕ - триатлон, самбо, фристайл. Çапла вара пирĕн республикăра спортăн 12 тĕп тĕсĕ шутланать: велоспорт-маунтинбайк, çăмăл атлетика, спорт кĕрешĕвĕ, спорт гимнастики, ухăран пересси, йывăр атлетика, биатлон, хăлха илтменнисен тата сусăррисен спорчĕ. Çакă ыттисене аталантарманнине пĕлтермест паллах. Тĕслĕхрен, Чăваш Республикинче спортăн 50 федерацине регистрациленĕ, вĕсен йышĕ ÿссех пырать.

Çу уйăхĕн 2-мĕшĕнче Чăваш Ен Пуçлăхĕ Михаил Игнатьев «Росинка» физкультурăпа сывлăх комплексĕнче пулнă. Унта вăл Пĕтĕм тĕнчери çамрăксен МИХĕсен, киностудийĕсемпе фотоклубĕсен «Атăл тăрăхĕнчи тĕл пулусем - 25» фестивальне хутшăннисемпе тĕл пулнă.

Çу уйăхĕн 1-мĕшĕнче Чăваш Ен Пуçлăхĕ Михаил Игнатьев Çуркуннепе Ĕç уявне халалланă мероприятисене хутшăнчĕ.