Archive - 8 Нарăс, 2014 - Хыпар

6 çул та 7 уйăх кĕтрĕмĕр ăна эпир, Раççейре пурăнакансем. Пĕрремĕш хут, 1980 çулхи çуллахи Олимпиадăна шута илмесен, куçа-куçăн тĕл пулатпăр хĕллехи Олимп вăййисемпе. Мĕнпе савăнтарĕ пире Сочи, мĕнле çĕнĕлĕхсемпе тĕлĕнтерĕ.

Республикăн Аслă сучĕ Шупашкар районĕн сучĕн тĕп хула администрацийĕн пуçлăхĕ пулнă Николай Емельяновăн ывăлĕ Дмитрий тĕлĕшпе палăртнă приговорне çирĕплетнĕ. Ăна çулталăклăха колони-поселение ăсатма, 3 çуллăха водитель удостоверенийĕсĕр хăварма йышăннă.

Нарăсăн 10-мĕшĕнче Раççейри дипломати ĕçченĕсем хăйсен професси уявне паллă тăваççĕ. Ăна çĕр-шыв Президенчĕн 2002 çулхи юпа уйăхĕнчи йышăнăвĕпе çирĕплетнĕ.

Нарăс уйăхĕн 5-мĕшĕнче Шупашкарта Раççейри аталану институчĕсен сумлă эксперчĕсемпе инвесторсем Чăваш Енри стартап-командăсемпе тата инноваци проекчĕсен хатĕрлевçисемпе тĕл пулчĕç. Ăна Russian StartUp Tour роуд-шоу мероприятийĕсемпе килĕшÿллĕн йĕркеленĕ.

Чĕмпĕр облаçĕнче пăлхар пуянĕсен мунчине тупни пирки пĕлтернĕччĕ. Унăн малашнехи шăпи мĕнлерех-ши?

Чĕмпĕр археологĕсем 1990 çулсен пуçламăшĕнче Хĕрлĕ Сÿнтĕк ялĕ çывăхĕнчи хулаш вырăнĕнче тупнă мунчана çавра тăрăпа хÿтĕлеме палăртнă.

«Чăваш шашки» мĕнле вăйă?

Чул хулара пурăнакан Виктор Медведев сĕтелçи вăййисен çĕнĕ тĕсĕсене шухăшласа тупнă. Вĕсене «чăваш шашки» тата «Шупашкар шашки» ят панă. Вăйă йĕрки пирки «Необычные шашки» кĕнекере çырса кăтартнă.

Кăçалхи Олимпиада пирĕн республикăшăн уйрăмах пĕлтерĕшлĕ. 42 çул хушшинче пĕрремĕш хут Чăваш Ен спортсменки Елена Муратова /тренерĕ - Валерий Васильев/ Олимп вăййисене хутшăнать. Европа кубокĕн çĕнтерÿçи, Раççей чемпионачĕн бронза призерĕ фристайл енĕпе /«могул» дисциплинăра/ ăмăртĕ.

Керлингпа кăсăкланакансем Раççей хĕрĕсен командин йышĕнче илемлĕ те хура сăнлă мулаткăна сăнанах пулĕ. Мускав пикине Нкеирука Езех тесе чĕнеççĕ, тăванĕсемпе юлташĕсемшĕн - Кира. Вăл чăваш хĕрĕпе негр каччин юратăвĕн çимĕçĕ.

Вăрçă шавĕ тахçанах лăпланнă, çапах унăн суранĕсем паян та тарăн-ха. Етĕрне хулинче пурăнакан Иустина Петровна Рыбакова 94 çулта пулин те çав çулсене хальхи пекех ас тăвать. Тылра ырми-канми тăрăшнă ветеран Ленинград блокадине те тÿссе ирттернĕ.

Ыттисемшĕн, урăх халăхсемшĕн, эпир хамăрлăхпа кăсăклă. Пирĕн те вĕсен культури, йăли-йĕрки пирки пĕлес килет. Вăл е ку халăх чунлăхĕ, кăмăл-сипечĕ, ăс-хакăлĕ никамшăн та ют мар. Çапла пулмалла та.