Archive - 26 Пуш, 2014 - Хыпар

Раççей халăх артистки Надежда Бабкина пуçарăвĕпе чăмăртаннă «Раççей юррисем» фестиваль-марафон 2007 çулхи пуш уйăхĕн 28-мĕшĕнче «старт» илнĕ. Пирĕн республикăра вăл 2008 çулхи çĕртме уйăхĕнче пулнăччĕ.

Чăваш Республикин Финанс министерствин пĕтĕмлетĕвĕсемпе 2013 çулта республика бюджетне тупăшсем енĕпе 35 млрд та 622 млн тенкĕлĕх пурнăçланă, 2012 çул шайĕнчен ÿсĕм 2 млрд та 363 млн тенкĕ е 7,1%. Харпăр хăй тупăшĕсене /налуксем, налук шутланманнисем/ 20 млрд та 385 млн тенкĕ чухлĕ пурнăçланă, 2012 çул шайĕнчен ÿсĕм 9,2%.

Чăваш Ен Пуçлăхĕ Михаил Игнатьев республикăри район-хула администрацийĕсен пуçлăхĕсемпе видеоконференци ирттернĕ. Республикăра пурăнакансене ĕçмелли паха шывпа тивĕçтерес тата автоçулсене юсас ыйтусене сÿтсе явнă.

Африка мурĕ пĕлтĕр Çурçĕр Осетие, Воронеж, Владимир, Ростов, Волгоград, Мускав, Тамбов, Тверь, Саратов, Белгород, Смоленск, Псков, Тула, Ярославль облаçĕсене, Краснодар крайне шар кăтартнă. Этем пурăнакан 73 пунктра сарăлнă, 77 объект вирусланнă. 72 пунктра килти хуçалăхри сыснасем чирленĕ, 12 объект инфекциленнĕ.

Ачана виçĕ çула çитиччен пăхмашкăн отпуск илнĕ хĕрарăмсем ĕç рынокĕнче социаллă хÿтлĕх кĕтекен граждансен ушкăнне кĕреççĕ. Пытармалли çук: çав тапхăр вĕçленнĕ хыççăн малтанхи ĕç вырăнне таврăнасшăн мар вĕсем, квалификаци шайĕ пурнăç ыйтнине тивĕçтерменнипе унчченхи профессийĕпе те ĕçлес туртăм çук. Çакнашкал лару-тăрура çамрăк амăшĕн карьерăна çĕнĕрен пуçлама тата йĕркелеме тивет, мĕншĕн тесен декрет отпускĕ вăхăтĕнче вăл хăнăхăва тата ăсталăха палăрмаллах çухатнă. Унсăр пуçне производство технологийĕсем те пĕр вырăнта тăмаççĕ, кунсерен çĕнелсе пыраççĕ.

Тĕп хулари "Радуга" культурăпа курав центрĕн Культура çулталăкĕнчи "Искусствăсен караванĕ" проекчĕпе килĕшÿллĕн - Шупашкарти вулавăшсенче "Третьяков галерейин шедеврĕсем" куçса çÿрекен куравĕ иртĕ.

"Радуга" центр вулавăшсемпе тытакан çыхăну çирĕп. Пĕрлехи вăйпа 10 çулта 248 курав ирттернĕ.

Чăваш патшалăх оперăпа балет театрĕнче нумаях пулмасть Г.Хирбю композиторăн "Нарспи" оперине кăтартрĕç. Ăна, сăмах май, театр никĕслевçи, Раççей, Чăваш халăх артисчĕ Борис Марков çуралнăранпа 90 çул çитнине халалланă.

Пуш уйăхĕн 25-мĕшĕнче Культура ĕçченĕн кунне паллă турĕç. Професси уявне республикăра сакăр пине яхăн çын кĕтсе илчĕ.

Культура вăл - обществăна аталанма пулăшакан хăватлă ăс-хакăл никĕсĕ, вăй илсе çирĕпленнĕ кăмăл-сипет пуянлăхĕ, несĕлсен пин-пин çулхи йăла-йĕркине ăрусемпе çыхăнтараканĕ.

Чăваш Ен культура ĕçченĕсем республикăра пурăнакан тĕрлĕ халăхăн хăй евĕрлĕ еткерлĕхне сыхласа хăварас тата малалла аталантарас ĕçе вышкайсăр пысăк тÿпе хываççĕ, ял-хула çыннисене наци тата тĕнче культурин пуянлăхĕпе паллаштараççĕ.

Сывă ачасенчен чылайăшĕ пурнăçăн малтанхи кунĕсенчех чăпăл тума еплерех килĕштернине алла пепке тытма ĕлкĕрнĕ ашшĕ-амăшĕ питĕ лайăх пĕлет. Чăн та, хăшĕ-пĕри шывран хăрани те пулать. Шикленессинчен хăтăлма пĕчĕкскерсене епле пулăшмалла-ха?

- Кăçал юр вăрах ирĕлет. Çурхи ейÿ пăтăрмахсемсĕрех иртсе каяссăн туйăнать. Çанталăк ăшша-сивве шайлашуллă сапаланă чухне шыв айне пулмăпăрах, - хăйне яваплă тивĕç шаннине асра тытса калаçать Валерий Александрович Леонтьев, Вăрмар районĕнчи Чупай ялĕн хисеплĕ çыннисенчен пĕри.