Archive - Çĕртме 2016 - Çамрăксен хаçачĕ

Мĕн вăл — таксидерми? Ахăртнех, чылайăшĕ сунарçăсен çуртĕнче кайăк-кĕшĕкĕн е чĕрчунăн кĕлеткине асăрханă. Вĕсене, паллах, музейра та курма май пур. Раççейре кунашкал кĕлеткене I Петĕр патша хушăвĕпе килĕшÿллĕн Кунсткамерăра пирвайхи хут вырнаçтарнă.

"Çамрăксен хаçачĕн" иртнĕ номерĕнче "Икĕ кунра — икĕ инкек" хыпарта шăрăх çанталăкра шывра путса вилнĕ тĕслĕхсем çинчен пĕлтернĕччĕ. Ăна вуланă хыççăн Шупашкар районĕнчи Хĕрлĕçыр ялĕнчи пĕвере путнă çамрăкăн тăванĕсем редакцие шăнкăравларĕç. "Пирĕн ахаль те пысăк хуйхă. 17-ри çамрăка пытартăмăр. Эсир тĕрĕс мар çырни суран çине тăвар сапнăнах туйăнчĕ. "Водолазсем унăн виллине виçĕ сехетрен тупнă" тени йăнăш. Тем чухлĕ шăнкăравласан та МЧСран никам та çитеймерĕ..." — пăлханса калаçрĕ Вера Николаева.

"Район больницинче нимĕнпе те пулăшмарĕç" статьяпа паллашнă хыççăн Йĕпреç районĕн больницин тĕп тухтăрĕ Наталия Мясникова редакцие шăнкăравлама кăна мар, кĕрсе тухма та вăхăт тупрĕ.

Утă уйăхĕн 1-3-мĕшĕсенче И.Н.Ульянов ячĕллĕ Чăваш патшалăх университетĕнче студентсен аталану центрĕсен ертÿçисем валли вĕренÿ семинарĕ иртĕ. «Студентсен лидерĕсене вĕрентмелли çирĕплетмен меслетсене хатĕрлени тата пĕрлештерни» ятлăскере аслă вĕренÿ заведенийĕ РФ Вĕренÿ министерстви тата «Раççей çамрăкĕсен союзĕ» тулли мар яваплă общество пулăшнипе йĕркеленĕ, ЧПУ студенчĕсен пĕрлешĕвĕсен ĕç-хĕлне аталантармалли программăпа килĕшÿллĕн пуçарнă.

Элĕксемшĕн кăçалхи çул чылайлăха асра юлĕ. Республика кунне уявламашкăн вĕсем тахçанах хатĕрленме тытăннă. Элĕксем истори еткерлĕхне упрама тăрăшаççĕ. ЧР Пуçлăхĕ Михаил Игнатьев ку туристсене яла илĕртмелли мелсенчен пĕри пулнине палăртнă.

Юлия Данилова «Çамрăксен хаçачĕн» редакцийĕ вырнаçнă Пичет çуртне çитсен шăнкăравларĕ. 6-мĕш хута лифтпа е картлашкапа хăпарма май пуррине каларăм. Вăл вĕсене курманнине пĕлтерчĕ те, тепĕр хутчен ăнлантарма пикентĕм. Пике ун патне анмашкăн, пулăшмашкăн ыйтрĕ.

Етĕрне районĕнчи Мăн Сĕнтĕрти Владимир Корнилов пĕр ирхине, нумаях пулмасть кăна пăруланă ĕнине вĕренлеме кайсан, чутах инкеке лекмен: ăна 600 килограма яхăн таякан икĕ вăкăр тапăннă. Сăнчăрта тăнăскерсем шалчине кăларса вĕçерĕнсе тарнă та ĕне çавăтса утакан арçын хыççăн чупнă. Тем пысăкăшскерсем хăваласа çитсен ним те мар тĕкме, таптама пултараççĕ вĕт. Çав самантра урампа иртсе пынă ветеринар пулăшман тăк Корниловран мĕн юлĕччĕ-ши? Кил хуçи хапхаран киле кĕрсе кайсан та вăкăрсем лăпланман, вĕсем пÿрт умĕнче ларакан машинăна тапăннă.

Мăн Сĕнтĕрсем Иван Степанова наукăпа тĕпчев институтне ярасшăн. Газ чарнă, çутă пралукне татса кайнă, ниçта та ĕçлемест, пахчинче нимĕн те лартса ÿстермест, çимелĕх укçи çук, анчах «çуттине» тупса ĕçет. Мĕнле пурăнать вăл кун пек условисенче? Ял халăхĕ ку ыйту тавра тем чухлĕ пуç ватсан та 52-ри хусахран тĕлĕнсе пĕтереймест. Сăмсине таçта та чикме юратакан журналистсене вара ку пушшех те кăсăклантарать. Килтех-ши вăл? «Ăçта кайтăр ĕнтĕ? Кунĕпех утать. Урама тухсан куратăрах. Анчах килĕ умĕнче ларатчĕ», — ăнлантарчĕç пире ял çыннисем.