Сăмах парăр-ха

22 Çурла, 2017

Тÿшеке ÿкессе пĕлсен кăна сарар мар

Апат-çимĕç лавкки умне икĕ ачаллă хĕрарăм пырса чарăнчĕ. Пепкисенчен пĕри — кÿмере, теприне алăран çавăтнăччĕ вăл. Тăватă-пилĕк çулта теме пулакан ывăлне çывăракан йăмăкне асăрхама каласа хăварчĕ те шалалла кĕрсе çухалчĕ амăшĕ. Унччен те пулмарĕ — лавкка умĕнче парковка вырăнĕ хĕсĕккине пула пĕр çăмăл автомашина кÿмене ярăнтаркаласа тăракан арçын ачапа çуммăнах пырса чарăнчĕ. Вăл килнине курсан хайхи шăпăрлан шикленнипе айккинелле пăрăнма хăтланчĕ. Кĕрĕс-мерĕс урапаллă кÿме чалăшса кайрĕ, тайăлса ÿкмех пуçларĕ. Вăраннă хĕр пĕрчи çари! çухăрса сасă пачĕ.

26 Çĕртме, 2017

Тавралăха камăн тирпейлемелле?

Республикăн тĕрлĕ кĕтесне ĕçпе çитсе чи малтанах ял администрацине кĕресси йăлана çаврăннă. Вырăнти лару-тăрупа специалистсем çийĕнчех паллаштараççĕ. Паллах, темĕн пирки те калаçатпăр вĕсемпе. Чылай чухне тавралăх тасалăхĕ тавра хăйсемех сăмах пуçараççĕ. Культура ĕçченĕсемпе пĕрле ял таврашне çÿп-çапран тасатса хăтлăх кĕртнине хам та пĕрре мар курнă. Капла хăна килсен кăтартса çÿреме кăмăллă. Эпир вĕт çырма-çатрана кĕрсе тухмасăр та каялла таврăнмастпăр.

10 Çу, 2017

Çĕнтерÿ йывăçĕсем

Пурнăç йĕркине улăштарма çук: Тăван çĕршывăн Аслă вăрçин ветеранĕсем çулсерен сахалланса пыраççĕ. Çапах вĕсем лартса хăварнă йывăç-тĕм вăй илсе сарăлнине сăнама кăмăллă. Кашни тăрăхрах Аслă Çĕнтерĕве халалланă аллея, парк хăйĕн илемĕпе илĕртет.

Хаçат ĕçĕпе çула тухнă май нумай ветеранпа тĕл пулма, вĕсен пурнăç çулĕ çинчен çырса кăтартма тÿр килнĕ. Вĕсем хăйсен шухăш-ĕмĕчĕпе паллаштарнă чухне йĕри-тавралăха, çав шутра скверсене, хăтлăлатас тĕллевпе йывăç лартас ĕçе малалла тăсасси пирки калатчĕç.

2 Çу, 2017

Хĕрÿ хĕвелĕн, ай, çунтарать ăшши, ан пултăр çеç вут-çулăмăн ташши

Тĕлĕнмелле çанталăк кăçал... Малтан, климат вырăнти нор¬мисене йăлт пăсса, ăшăтса пăрахать, унтан шăнтса лартать. Раштав уйăхĕнче урамра акă нуль градусран та çÿлерех кăтартрĕ термометр, анчах та çан¬талăк хăйĕн йĕрĕнчен пăрăнмасть — каярахпа пурпĕр шатăртаттарчĕ сивĕ. “Пуш уйăхĕн вĕçĕнче юр ирĕлчĕ васкаса”, — çырнă тахçанах классик. Кăçал вара вĕçĕччен кĕтсе тăмарĕ, маларахах чÿхенме пуçларĕç кайăксем кÿлленчĕксенче. Çанталăк каллех хăйĕннех турĕ — тытрĕ те ака уйăхĕн çурри иртсен тавралăха тем хулăнăш юрпа хупласа хучĕ.

22 Ака, 2017

Канфет вырăнне...

Пирус туртни, эрех-сăрапа айкашни çын организмне начар витĕм кÿнине кашниех пĕлетпĕр. Анчах та сиенлĕ йăласенчен хăпма çăмăлах мар. Сигарет таврашĕнче те, эрех-сăрара та усал япаласем пур. Организм çакна хăнăхать те вĕсемсĕр пурăнайми пулса çитет. Татах та татах ыйтать... Чунпа чи çирĕпписем те чи вăйлисем çеç çак астармăшсенчен хăпма пултараççĕ.

Pages