Archive - 13 Чÿк, 2014 - Хыпар

Культурăпа çутĕç программипе те палăрса тăрать вăл.    Шупашкар тата Чăваш митрополичĕн, Чăваш митрополи пуçлăхĕн Варнавăн пилĕпе ноябрĕн 12-17-мĕшĕсенче тĕп хулари МТВ центрта "Ӳкĕнӳрен Раççей чĕрĕлĕвĕ патне" ятпа Пĕтĕм тĕнчери православи курав-ярмăркки иртет.

Республика Правительствин ĕнер Иван Моторин премьер ертсе пынипе иртнĕ ларăвĕн кун йĕрки самай анлă пулчĕ - 32 ыйту. Çапах вĕсене кал-кал тишкерчĕç, тавлашма, сасă хăпартма хистекен самантсем пулмарĕç.

Ларура хула тăвас ĕçе йĕркелесе пырасси, тÿлевсĕр юридици пулăшăвĕ кÿресси, муниципалитетсен çурт-йĕр тĕрĕслевĕ çинчен калакан саккунсене улшăнусем кĕртессине ырларĕç, финанс министрĕ Светлана Енилина хăй ертсе пыракан министерство ĕçĕ çинчен отчет турĕ - такăнтаракан «тумхахсем» пулмарĕç темелле.

Патăрьелти культурăпа кану центрĕнче "Чăваш пики - 2014" конкурс иртнĕ. Йăлана кĕнĕ çак меропрятие пултаруллă çамрăксене тупса палăртас, чăваш халăх культурине, йăли-йĕркине упрас, ялсенчи яш-кĕрĕмпе хĕр-упраç хушшинчи социаллă тата культура çыхăнăвĕсене аталантарас тĕллевпе йĕркеленĕ.

Вăрнарти музейра чĕрĕ лĕпĕшсен куравĕ ĕçлет. Вăл куракансемшĕн, уйрăмах ачасемшĕн, питĕ кăсăклă. Çак кунсенче аваллăх управçин директорĕ Елена Шарипова илемлĕ лĕпĕшсемшĕн "анне" пулса тăнă. Вăл вĕсене çитерет, ĕçтерет, çĕнĕ "ăрăва" та йышăнать. Музейра çĕр чăмăрĕ çинчи чи пысăк лĕпĕш - павлиноглазка атлас - çут тĕнчене килни тĕлĕнтермĕш мар-и вара/

ЧР прокурорĕн пĕрремĕш çумĕ Виталий Щетинкин 39 çулти Сергей Баталыгин тĕлĕшпе пуçарнă уголовлă ĕçпе айăплав пĕтĕмлетĕвне çирĕплетнĕ. Ăна уйрăмах пысăк виçепе улталанăшăн айăплаççĕ.

Следстви версийĕпе килĕшÿллĕн Баталыгин Шупашкарти «Инженери центрĕ» НПП» ООО директорĕ пулнă май «Сорочинскри çу экстракчĕн завочĕ» ООО ертÿçисене улталанă. Оренбург облаçĕнчи çав предприяти валли электроподстанци тата электролини тăватпăр тесе Инженери центрĕн шучĕ çине куçарнă 110 млн яхăн тенке вăрланă.

Ноябрĕн 10-мĕшĕнче ЧР Правительствин Председателĕ Иван Моторин РФ строительство министрĕ Михаил Мень видеоконференци мелĕпе ирттернĕ пĕтĕм Раççейри селектор канашлăвне хутшăннă. Унта федераци субъекчĕсенче граждансене юхăннă çуртсенчен куçарас ĕç мĕнле пынине пĕтĕмлетнĕ.

М.Мень палăртнă тăрăх - 2014 çулта çĕршывра пĕтĕмпе 211 пин çынна кивĕ çуртсенчен куçармалла. Чылай регион ку енĕпе ăнăçлă ĕçлет. Анчах юлса пыраканнисем те пур. Вĕсен шутĕнче - Тверь, Тула, Иваново, Волгоград облаçĕсем, Коми, Дагестан республикисем тата ыттисем.

Октябрь уйăхĕн 30-мĕшĕнче Шупашкарти коопераци институтĕнче "Хальхи вăхăтра çĕршывăн апат-çимĕç хăрушсăрлăхне тивĕçтерессипе çыхăннă йывăрлăхсем тата потребительсен кооперацийĕн тĕллевĕсем" ыйтупа "çавра сĕтел" иртрĕ. Унта Раççей коопераци университечĕн, унăн Шупашкарти, Хусанти, Саранскри, Мичуринскри институчĕсемпе филиалĕсен профессорĕсемпе преподавателĕсем, патшалăхпа муниципалитет органĕсен тата коопераци организацийĕсен ĕçченĕсем хутшăнчĕç.

Ноябрĕн 16-мĕшĕнче кăвар чĕреллĕ поэтăмăр Çеçпĕл Мишши çуралнăранпа 115 çул çитет. Çак сăвăçа чăваш чĕлхин шăпи питĕ шухăшлаттарнă. Тăван сăмах, чĕлхе пĕлтерĕшĕ пирки вăл çапла çырнă: «Вăхăт çитĕ. Чăваш чĕлхи те тимĕр татĕ. Çивĕч пулĕ. Хĕртнĕ хурçă пек пулĕ.