"Эпĕ чăваш хĕрарăмĕсене юратнине ăçтан пĕлтĕр?" — кил хапхинчен тухсах кĕтсе илчĕ пире Владислав Сергейчев. Етĕрне районĕнчи Уйкас Асламасра ырă ят çĕнсе илнĕ çак арçын. Пулă тытать те — ытлашшине çынсене валеçсе парать. Килтен тухса çÿремен кинемейсем валли кăмпа татса килет.
Елена Соловьева Сĕнтĕрвăрри районĕнчи Кĕсле ялĕнче çуралнă. Ĕлĕк-авал çак тăрăхра кĕсле тунă теççĕ. Çавăнпах кунти халăх музыкăна лайăх ăнланать. Елена Леонидовна юрлама кăна мар, çыхма та, тĕрлеме те ăста. "Пурнăçа, çывăх çынсене чунран юратмалла, вара ĕç майлашăнса пырать", — кăмăлĕ лайăх хĕрарăмăн. Унăн ашшĕпе амăшĕ Леонид Ивановичпа Нина Федоровна Плотниковсем те килте ĕçе пайласа тăман. Уявсенче купăс каласа юрланă.
Çĕрпÿ районĕнчи Энĕшкасси Кушкăри Августина Константинова те хăнасем килессе сиссе, те хулана кайнă мăшăрне кĕтсе сĕтел тулли апат хатĕрленĕ. Çитмĕл саккăрти вăр-вар хĕрарăм шаркку, кукăль, çăкăр пĕçернĕ, тăпăрч юхтарнă. Темиçе тĕрлĕ чей, кофе, канфет, печени, сыр кăларса лартрĕ вăл.
Района командировкăна каймассерен библиотекăна кĕрсе тухма тăрăшатăп. Раççейри Кино çулталăкне халалланă курав яланах куç тĕлне пулать. Тани Юнăн "Иртнĕ кунсем-çулсем" кĕнеки тавра калаçу пуçаратпăр. Унта чăвашла картинăсем ÿкерни çинчен çырса кăтартнă вăл. Асаилÿ шыв юххи пекех вуланать. "Атăл пăлхавçисем" чăвашсен пĕрремĕш фильмĕнчи Элиме рольне çăпатапа утма, кĕвентепе шыв йăтма, кĕпе чÿхеме, сÿс тÿме пĕлмен хĕре шанса пани, паллах, режиссера тарăхтарнă. Хăш-пĕр сыпăкра ун вырăнне Тани Юна выляма лекнĕ.
Етĕрне районĕнчи Кăкшăм вăтам шкулĕнчи акăлчан чĕлхи вĕрентекенĕн Надежда Ивановăн чикĕ леш енче юлташ нумай. Нумаях пулмасть Вăтаçĕр тинĕсĕ хĕрринчи Генуяри Биргит фон Нордхайм крокус суханĕсем янă. Кĕçех посылка Чăваш Республикине çитĕ. Анат Мучар хĕрĕ тусĕ валли кучченеç хатĕрлет.
Чăвашла верси
Русская версия
