Шупашкар хула администрацийĕн пуçлăхĕ Алексей Ладыков паян журналистсемпе тĕл пулчĕ. Пресс-конференци вăхăтĕнчех «Инстаграмра» тÿрĕ эфирта хула çыннисен ыйтăвĕсене хуравларĕ.
Паян ЧР Пуçлăхĕ Олег Николаев «Хăтлă хула хăтлăхне йĕркелесси» регион проектне республикăра пурнăçлассипе ĕçлекен ведомствăсен хушшинчи комисси ларăвне ирттерчĕ.
Çав регион проектне 2020 çулта еплерех пурнăçлани тата килес çул пурнăçласси çинчен ЧР строительство министрĕ Александр Героев каласа пачĕ. Олег Николаев ыррине тивĕçлипе хакларĕ пулин те проекта пурнăçласа «туса çитермен ĕçсем» пур терĕ.
Пандеми пĕтĕм пурнăçа пуçхĕрлĕ çавăрса хучĕ пулин те аталану пирки манман – социаллă ыйтусемпе те, экономикăна вăй парас тĕлĕшпе те çине тăрса ĕçленĕ. Çапларах палăртмалла-тăр ЧР Пуçлăхĕ Олег Николаев паян ирттернĕ, çулталăка пĕтĕмлетессине халалланă пресс-конференцири калаçăвăн тĕп шăнăрне.