Новости по теме

Патшалăх пурлăхне приватизацилессипе çыхăннă ыйтупа тунтикунхи канашлура экономика аталанăвĕн министрĕ Дмитрий Краснов сăмах илчĕ. Тĕллев — патшалăхăн экономикăри тӳпине чакарса пырасси, пурлăха тытса тăрассипе çыхăннă тăкаксене чакарасси. Шăпах çакна тĕпе хурса ĕçленĕ. Пĕлтĕр 34,5 миллион тенкĕлĕх пурлăха сутнă — çак укçа бюджета кĕнĕ ĕнтĕ. Çав вăхăтрах министр хăш-пĕр предприятин патшалăх аллинчи акцийĕсем сутăнманнине те çирĕплетрĕ.

ЧР цифра министрĕ Кристина Майнина тата сывлăх сыхлавĕн министрĕн пĕрремĕш заместителĕ Алексей Кизилов антителăллă çынсене куар-код парассипе çыхăннă ыйтупа брифинг ирттерчĕç.

ИФА-тест тăвас тесен республикăри 16 лабораторире /вĕсем Шупашкарти, Çĕнĕ Шупашкарти, Канаш, Улатăр, Çĕмĕрле районĕсенчи больницăсенче вырнаçнă/ юн анализĕ памалла. Районсенче пурăнакансен ку ыйтупа вырăнти тĕп больницăсене каймалла. Унта анализ илеççĕ те лабораторие ярса параççĕ. Харпăр лабораторисене те кайма юрать, анчах малтан унти даннăйсене портала кĕртнине пĕлмелле.

Пĕлтĕр Чăваш Ен пурăнмалли 716 пин тăваткал метр çурт-йĕр хута янă — виçĕм çулхинчен чылай нумайрах. Çакăнта строительсене тĕревлемелли, граждансенем хваттер туянма пулăшмалли мерăсемпе усă курнин витĕмĕ пысăк. Калăпăр, уйрăм категорисен ипотекăшăн хывакан пуçламăш тӳлевне саплаштарни. Ку меслетпе 272 çемье усă курнă. 2021 çулта çул-йĕр инфратытăмне аталантарас енĕпе малалла ĕçленĕ. Çулсен 460 километрне юсанă, çĕнĕ 8 километр çул хывнă.

Патшалăх Канашĕн кĕçнерникун иртнĕ черетлĕ улттăмĕш сессийĕнче ЧР Пуçлăхĕ Олег Николаев Министрсен Кабинечĕн 2021 çулхи ĕçĕ çинчен отчет турĕ.