Новости по теме

Шупашкар районĕнчи Çĕнĕ Тутаркасси поселокĕнчи пĕр хваттерте пушар тухсан çуртра пурăнакансен умне хăрушлăх тухса тăнă.

Ку инкек ака уйăхĕн 8-мĕшĕнче пулса иртнĕ. Хваттерте пурăнакансем çулăмран тарса хăйсем тĕллĕн тухнă. Анчах çӳлерех пурăнакан кӳршĕсене эвакуациленме çăра тĕтĕм чăрмантарнă. 46 çулти хĕрарăма, 85-ри пенсионеркăна тата 14-ри хĕрачана 41-мĕш пушарпа çăлав чаçĕн ĕçченĕсем пулăшнă. Кукамăшĕпе мăнукне медицина пулăшăвĕ пама больницăна вырнаçтарнă.

Вăрнарти хутăш препаратсен завочĕ кăçал çĕнĕ йышши 13 препарат хатĕрлеме палăртса хунă.

8-ăшĕнпе ĕçлеме пуçланă та ĕнтĕ. Вĕсене «Август» компанин ăслăлăх ĕçченĕсем шухăшласа тупнă. Кăçал производствăна янă 6 препарат — çум курăкĕпе кĕрешмелли гербицидсем. Ӳсен-тăрана чир-чĕртен хӳтĕлеме çĕнĕ йышши 2 фунгицид хатĕрлеме тытăннă. Вăл çĕр улмине — фитофторозран, суханпа иçĕм çырлине ытти чиртен хӳтĕлĕ. Ака уйăхĕнче тата тăватă препарата производствăна ярасшăн.

Канмалли кунсенче Шупашкартан Чул хулана туристсем валли Атăл тăрăх тур йĕркелесшĕн.

Шыв çинчи çул çӳрев навигаци сезонĕ уçăлсан пуçланма пултарать. Халĕ çавăн валли кирлĕ хутсем хатĕрлеççĕ. Питĕрти пысăк портран Раççей Федерацийĕн ялавĕпе ишме ирĕк илнĕ. Çапла кăçал «Шупашкар – Козьмодемьянск — Макарьево мăнастирĕ — Чул хула — Шупашкар» туризм маршручĕ уçăлмалла. Пассажирсене турттаракан рейс та çӳретесшĕн.

Чăваш Енре пурăнакансене Пĕтĕм Раççейри «Эпир» наци видеороликĕсен конкурсне хутшăнма йыхравлаççĕ.

«Раççейри нацисен хушшинчи килĕшӳ» тата «Наци хăйне евĕрлĕхĕ» темăсенчен пĕрне суйласа илмелле те видео хатĕрлемелле, файлообменнике вырнаçтармалла та çуллаччен мыконкурс.рф сайтра заявка çырмалла. Пĕчченшерĕн те, ушкăнпа та хутшăнма юрать. Çĕнтерӳçĕсене чӳк уйăхĕн 4-мĕшĕнче Халăхсен пĕрлĕхĕн кунĕнче чыслĕç. Мала тухнисене укçан преми парса хавхалантарĕç.