Почта ĕçĕ сире тивĕçтерет-и? Хаçат-журнал хакĕсем мĕншĕн ÿсеççĕ? «Хыпар» хаçатпа унăн ытти кăларăмĕ сирĕн килĕре вăхăтра çитет-и? Почтальон ят-сумĕ мĕншĕн чакать? Çак тата ытти ыйтăва, хисеплĕ вулаканăмăрсем, 2014 çулхи ака уйăхĕн 3-мĕшĕнче, кĕçнерни кун, «Хыпар» хаçат редакцийĕнче Раççей Почтин Чăваш Енри управленийĕн директорĕ Владимир Георгиевич Тимофеев хуравлать.
Çак кунсенче Японире сакура чечеке ларать. Чăваш Енре çуркунне йăл илет. Илемлĕ çак вăхăтра Регионсен аталанăвĕн "Содружество" фончĕ Шупашкара Япони сывлăшне илсе килчĕ. "Кино музейĕ" проектпа килĕшÿллĕн "Çеçпĕл" кинотеатрта пĕрремĕш хут Япони киновĕн фестивалĕ, Ясудзиро Одзу режиссера халалланăскер, уçăлчĕ.
Паян республика Пуçлăхĕ Михаил Игнатьев тата федерацин ĕç тăвакан органĕсен ертÿçисем Шупашкарти «Трактор завочĕсем» концернра тыр-пул пухмалли «Агромаш 4000» комбайнсен производствине йĕркелесе яни çинчен пĕлтерчĕç. Вĕсене туса кăлармалли технологие ĕçе кĕртмелли проекта Атăлçире пуçласа Шупашкарти «Промтрактор» обществăра пурнăçа кĕртнĕ.
...Талантлă ачасене пулăшаççĕ. Анчах та вĕсем хăйсен ĕçĕнче юлни-юлманнине тишкереççĕ-и? Мониторинг кăтартнă тăрăх ЧР Президенчĕн стипендине тивĕçнисен 70 проценчĕ вырăнта тĕпленмест иккен. Шкултан лайăх паллăсемпе вĕренсе тухакансене ăнланма пулать-ха, ун пеккисем пуян пĕлÿ илмешкĕн пысăк хуласене çул тытаççĕ. Ыттисем вара? Асăннă стипенди пĕлтерĕшне ÿстерес тĕллевпе, тен, ăна тивĕçмелли условисене тепĕр хут пăхса тухмалла тата çирĕплетмелле?
Тĕплĕнрех - "Хыпар" хаçатăн кăçалхи пуш уйăхĕн 27-мĕшĕнчи номерĕнче.
Санкт-Петербургра лайф-сейвинг енĕпе шывра путакансене çăлакансен Пĕтĕм Раççейри пĕрлешĕвĕн чемпионачĕ вĕçленнĕ.
"Пăва çулĕ çинче" повеç пичетленсе тухсассăн унăн авторĕн ăсталăхне литература тĕпчевçи Михаил Сироткин пысăк хак панă. 1964 çулта вара Алексей Талвир "Никĕс" роман кăларнă. Кĕçех ăна вырăсла куçарса пичетленĕ. Çĕнĕ кĕнекине ахаль çынсем те, литература тĕпчевçисем те ырласа йышăннă. Çыравçăн ытти кĕнеки те вулакана хумхантарать, илĕртет. Алексей Филиппович çуралнăранпа 105 çул çитнине халалласа Шупашкарти литература музейĕнче асăну иртрĕ.
Министрсен Кабинечĕн ЧР Пуçлăхĕ Михаил Игнатьев ертсе пынипе иртнĕ ĕнерхи ларăвĕнче Финанс министрĕн тивĕçĕсене пурнăçлакан Фарида Муратова республикăн 2013 çулхи бюджетне пурнăçлани çинчен калакан саккун прекчĕпе паллаштарчĕ.
Сĕнтĕрвăрри районĕнчи Çичĕпÿрт ялĕнче пурăнакан Терентий Дверенин 95 çулхи юбилейне паллă тунă. Терентий Парамонович пуканесем ăсталас енĕпе ĕçлет. Çавна май тĕрлĕ курава хутшăнать. Пултаруллă ватта республикăра çеç мар, Раççейре те пĕлеççĕ. Ун патне ют çĕршыв турисчĕсем те килеççĕ. Халĕ вăл Çĕнтерÿ кунĕ валли экспозици хатĕрлет. Танк та ăсталанă. Вăрçă çулĕсенче вăл механик-водительте вăй хунă.
Кăçал ăна «Сĕнтĕрвăрри районĕн хисеплĕ гражданинĕ» ят парса чысланă.
Ĕпхÿ мэрийĕ 2013 çулхи кĕркунне Чăваш вырсарни шкулĕ вырнаçнă кермене, XIX ĕмĕрте хута янăскере, сутма шухăш тытни, 2014 çулхи нарăс уйăхĕнче иртнĕ аукционра Нефтекамск бизнесменĕ çĕнтерни, çурта тара илни çинчен маларах пĕлтернĕччĕ ĕнтĕ. Администрацин çурт авари хăрушлăхĕ кăларса тăратнăран çак утăма тума тивнĕ. Суту-илÿ килĕшĕвĕпе усламçăн авалхи кермене хăйĕн укçи-тенкипе юсаса çĕнетнĕ хыççăн 187,7 тăваткал метра Чăваш вырсарни шкулне памалла. Ытти лаптăк çинче унăн офиссемпе суту-илÿ вырăнĕсене уçма ирĕк пур.
Ĕлĕкрех «Отходничество» текен ăнлав анлă сарăлнă. Ютра ĕçлесе çÿрекенсем е унтах тĕпленнисем пирки çапла каланă. Пĕр шутласан халăх ĕç шыраса пĕр вырăнтан тепĕр çĕре куçнинче ним япăххи çук. Шел пулин те тĕнче касса çÿрекен чăвашсем, вĕсен йышĕ çинчен тĕп-тĕрĕс статистика илсе кăтартаймастпăр. Юлашки çулсенче ку туртăм вăйланни сисĕнет. Ун тымарĕсем ăçтан амаланаççĕ? Ĕç рынокĕнчи лару-тăру еплерех? Асăннă ыйтусене сÿтсе явма вăхăт çитнĕ тесе палăртать «Хыпар» хаçат «Ăçтала çул тытатăн, тăванăм?» материалта.
Чăвашла верси
Русская версия
