Archive - Кăрлач 2014 - Тантăш

Канаш районĕнчи Кайри Ăнтавăш ялĕнче пурăнакан Вика Петровăшăн кăçалхи çул ыттисенчен пуринчен те ытларах асра юлĕ. Уншăн вăл - чи ăнăçли.

Кушак çулĕнче çуралнăскере ашшĕпе амăшĕ арăслан пек вăйлă пултăрччĕ тесе Лев ят панă. Арçын ача ÿсерехпе кил таврашĕнчи ĕçсенче ытларах та ытларах пулăшма тытăннă. Шăллĕпе йăмăкĕшĕн те вăл - чăн-чăн хÿтĕлевçĕ, арăслан пекех. Вун пĕр çулти Ваня урок тума ларсан, пиччĕшĕ яланах çумра. Ксюша та унран хăпасшăн мар.

Писателе халалласа...

Иртнĕ çул вĕçĕнче Палтай шкулĕнче СССР писателĕсен Союзĕн членĕ, прозаик, çыравçă-фронтовик Алексей Фомич Медведев 100 çул тултарнă ятпа уяв иртнĕ. "Аса илÿсемпе пуян пулчĕ çак мероприяти", - пĕлтерет чăваш чĕлхипе литературине вĕрентекен Надежда Валериановна Серебрякова.

Кадетсен Георгий балĕ иртсе кайрĕ пулин те аса илÿсем паян та чуна ăшăтаççĕ-ха. Иртнĕ номерте каламаннине паян хускатăпăр.

Çĕмĕрлери 6-мĕш шкул кадечĕсем - бала уçакансем пулса тăчĕç. Çиччĕмĕшĕнче вĕренекен Таня Маркова, Наташа Федорова тата Александра Павлова кадет класне иккĕмĕш çул çÿреççĕ. Хастарскерсем пур çĕре те ĕлкĕреççĕ, хăйсене тĕрлĕ енлĕн аталантараççĕ.

Хастарлăхпа, ăсталăхпа палăраççĕ!

Вырăскас Пикшиксем ăш пиллĕ, тараватлă пулнине унти шкула кĕрсенех ăнланса илтĕм. Палламан çынна курсан та сывлăх сунаççĕ. Ун пек чухне сăн-пит йăл кулăпа çуталать, чĕре савăнăçпа тулать çав. Лайăх паллăсемпе çеç вĕренме тăрăшаççĕ çак шкул ачисем, унсăр пуçне, районпа республикăра иртекен мероприятие хастар хутшăнма тăрăшаççĕ. Уйрăмах тĕрлĕ предмет олимпиадинче палăрнисем нумай кунта. Кашни çулах Раççей шайĕнче иртекен чылай конкурс-викторинăра çĕнтернисем те пĕрре çеç мар.

Тăван шкулта хаваслă та асра юлакан пулăм иртессине кашни пĕлнĕ. Унта пурте çитме ăнтăлнă. Уçă урока вара 3, 4, 5 тата 6 класс ачисем йышлăн пуçтарăнчĕç.

Пултаруллă ача пур ĕçе те хастар хутшăнать. Иртнĕ çул республика Пуçлăхĕн стипендине илсе тăнă Димитрий Ильин пирки те çаплах калас килет. Ĕçне тăвиччен тĕплĕн шухăшлама хăнăхнăскер хавхалану укçин пĕр пусне те тĕкĕнмен-ха, унпа тĕллевлĕ усă курасшăн. Çитĕнÿ тăрăшуллисене юратать.

«Эпĕ хресчен хĕрĕ», - тет Ева Лисина çыравçă. Капла калама сăлтавĕ пурах. Вăл ÿснĕ Патăрьел районĕнчи Çĕньялти урама та Хиртикас теççĕ. Хушамачĕ те унăн таврари чаплă пахчаçăн, аслашшĕн, хушамачĕ пулнă. Виççĕшне те, виçĕ пĕр тăвана, Айхи Геннадийĕ, Айхи Луизи, Айхи Еви тесе чĕннĕ.

Канаш районĕнчи Шелттем шкулне пырса кĕрсенех кунта алă усса ларма юратман ачасем вĕреннине туйрăм. Вĕсен пĕр пушă вăхăт та çук тейĕн. Тăхтава та усăллă ирттерме тăрăшаççĕ арçын ачасемпе хĕр ачасем. Хăшĕ-пĕри тепĕр урока хатĕрленет: киле ĕçне аса илет. Теприсен - тĕрĕслев ĕçĕ... Ăна валли те правилăсемпе теоремăсене пăхса тухмалла. Библиотекăна çул тытакан та сахал мар. Акă теннис сĕтелĕ патĕнче пĕр ушкăн пухăннă, пурте тусĕ-сем еплерех вылянине сăнаса тăраççĕ, хавхаланаççĕ... Кĕçĕн классен вĕренÿ кунĕ те вĕçленнĕ ĕнтĕ, анчах вĕсем те киле кайма васкамаççĕ.

Юнкă шкулĕ пĕлтĕр 135 çул тултарчĕ. 1966 çулта ăна Спиридон Михайлович Михайлов-Янтуш ятне панă. Вăл камне пĕлмен çын çук та пулĕ. Спиридон Михайлов _ пĕрремĕш чăваш историкĕ, этнографĕ, халăх сăмахлăхне пуçтараканĕ. Ун ячĕпе шкулта тăтăшах чăваш чĕлхи эрни е вунă кунлăх иртет.

Класс тулашĕнчи ĕçсене йĕркелекен Ирина Григорьевна Илларионова шкул пурнăçĕпе хаваспах паллаштарма ки- лĕшрĕ. Паянхи куна та 158 ача вĕренет. Шкул автобусĕ тăватă яла ĕлкĕрсе пурне те урока вăхăтра çитерет.