Паян, нарăс уйăхĕн 17-мĕшĕнче, Шупашкарти Ача-пăчапа çамрăксен пултарулăх керменĕнче «Ачалăх ячĕпе, ачалăхшăн» ыр кăмăллăх марафонĕ старт илчĕ. «Раççей ача-пăча фончĕн» Чăваш регион уйрăмĕ кăçал 30 çул тултарчĕ. Çавна май уява пухăннисене юбилей ячĕпе Чăваш регион уйрăмĕн правленийĕн ертÿçи Юрий Кислов саламларĕ. Çак ырă ĕçе пуçаракансене аса илчĕ, вăл вăхăтри нушаллă пурнăçа куç умне кăларчĕ.
Раççей ял хуçалăх банкĕ 18 çул Чăваш Республикипе тачă çыхăнса ĕçлет. Çак вăхăтра республикăри экономикăна аталантарма 63 млрд тенкĕ ытла укçа хывнă, вĕсенчен 70 процентне — агропромышленноç комплексне аталантарма. Çавăн пекех асăннă банк Чăваш Енри 130 ытла инвестици проектне пурнăçа кĕртмешкĕн пулăшнă.
Социализм Ĕçĕн Геройĕ Евлалия Ивановна Васильева 1923 çулта Муркаш районĕнчи Улăх ялĕнче (халĕ Юнкă) нумай ачаллă çемьере кун çути курнă. Улттăмĕш ача пулса ÿснĕ.
Çак кунсенче Элĕк районĕнчи Тури Хурасанта пурăнакансем хăйсен тăрăхĕнче тилĕ хунаса кайни çинчен редакцие шăнкăравласа пĕлтерчĕç. «Пĕр каçра 4 чăха тытрĕç», — терĕ кинемей пăшăрханса. Урамрах çÿреççĕ иккен вĕсем. Çитменнине хăрамаççĕ те. Асăннă ялта çеç мар, кÿршĕри Анатри Хурасанта, Шуркассинче, Тури тата Анатри Юлăшра алхасать тискер чĕр чун. Чăх-чĕппе пĕрлех хур-кăвакала та, кăрккана та тиркемест иккен. Ял халăхĕ ĕрчевлĕскере епле пĕтермелли çинчен шухăшлать.