— Йывăрлăхсем хăйсене хăйсем пулмаççĕ, вĕсене эпир хамăрах тупатпăр. Çавăнпах лару-тăрăва кăткăслатмасăр пурăнма вĕренмелле. Тепĕр тесен, çулсем иртнĕ май çын кулленхи ыйтусене çăмăллăнах татса пама вĕренсе çитет, ку хăйне евĕр йĕрке пулса тăрать. Паянхи кун мана çав тери канăçсăрлантарканни пур теейместĕп. Пурнăçри хăш-пĕр лару-тăру кăштах шухăшлаттарать ĕнтĕ...
"74 çула çитрĕм. Шутлă кунсем юлчĕç пуль", — пăшăрханса калаçать хăшĕ-пĕри. Унашкал шухăш çынна пушшех ватăлтарать. "74-ран кăна иртрĕм-ха. Малашне мĕн чухлĕ çĕнĕлĕх кĕтет", — хама çапла хавхалантарма хăнăхнă. Йывăрлăха чăтса ирттермелле, ыррине шанмалла. Хуйхăрса пурăнма юрамасть. Ирхине хĕвел тухнăшăн та, чĕрĕ-сывă пулнăшăн та савăнма пĕлмелле.
— Темĕн те кулянтарать. Пурнăçра шухăшлаттараканни, пăшăрхантараканни сахал мар. Сăмахран, халăх театра тухса çÿресшĕнех мар. Шăпах çакă чунăма ыраттарать. Ялтисене илес пулсан, халь çула тухма та ансат, кашнин килĕнче çăмăл машина пур, маршрут автобусĕсем те чупаççĕ. Билет хакĕ те пысăк мар-çке.
Юлашки вăхăтра сцена çине тухманпа пĕрех. Аннене, пиччене пăхнă вăхăтра концерта хутшăнма кăмăл пулман. Иккĕшĕ те çут тĕнчерен уйрăлса кайрĕç. Тĕнчери чи çывăх çыннăм Наталья Николаевна Матросова 93 çула çитиччен пурăнчĕ. «Юрла, хĕрĕм, юрла, çынсене савăнтар», — каласа хăварчĕ мана.
— Çулланса, аслăланса пынă май пурнăç çине те урăхла куçпа пăхма тытăнатăн. Çемьеллĕ çынна, паллах, ачасене тĕрĕс воспитани парасси те шухăшлаттарать. Вĕсем ÿснĕçемĕн хамăр валли те çĕннине нумай илетпĕр. Юлашки вăхăтра алла тĕрлĕ кĕнеке час-часах тытатăп халĕ.
Чăвашла верси
Русская версия
