Хĕвеллĕ çанталăк пекех лайăх паян халăхăн кăмăлĕ
778-мĕш суйлав участокĕ Шупашкарти Совет Союзĕн Геройĕ А.В.Кочетов полковник ячĕллĕ кадет шкулĕнче вырнаçнă. Кăмăла çĕклентерсе ирех юрă-кĕвĕ янăрать. Сасăлакансене йышăниччен суйлав комиссийĕн председателĕ Наталья Фомирякова паянхи ĕç йĕркипе тепĕр хут паллаштарать. Сăнавçăсене уйрăмах тимлĕ пулма ыйтать Наталья Александровна. Урнăсем - пушă, йĕри-тавра агитаци материалĕсем çук. Сăмах май, суйлава пĕрремĕш хут хутшăнакансем валли яланхи пекех парне хатĕрленĕ.
8 сехет. Суйлавçăсем пуçтарăнма пуçларĕç. Чи малтанхисен йышĕнче - ЧР сывлăх сыхлавĕпе социаллă аталану министрĕ Алла Самойлова. Вăл "Чăваш хĕрарăмĕ" хаçат корреспонденчĕн ыйтăвĕсене хуравлама килĕшрĕ.
- Алла Владимировна, мĕнле кăмăлпа килтĕр суйлава?
- Паянхи хĕвеллĕ çанталăк пекех лайăх манăн кăмăл. Йăлтах йĕркеллĕ, килĕшÿллĕ.
- Суйлав участокне яланах малтан çитетĕр-и?
- Паллах. Манăн ĕç çавнашкал.
- Калăр-ха, паянхи суйлав республика аталанăвне мĕнле витĕм кÿрĕ?
- Кирек хăш суйлав - пуласлăх пуçламăшĕ. Манăн шухăшпа, пирĕншĕн пуласлăх пуçламăшĕ кăна мар, хальхин тăсăмĕ пулĕ.
- Сирĕн шухăшпа, суйлав умĕнхи кампани мĕнле иртрĕ?
- Лайăхах. Кĕскен калас-тăк - тасан, лăпкăн тата ытлашши шăв-шавсăр.
Паянхи кун уява çаврăннине чун туять. Халăх суйлав участокĕ еннелле утни таçтанах курăнать. Çынсем савăнăçлă. Кашниех хăй камшăн тата мĕншĕн сасăламаллине тахçанах палăртнă ĕнтĕ.
Общество транспортĕнче пĕр кинемейĕн чăрсăрлăхĕ тĕлĕнтерчĕ. 8 сехет кăна иртнĕччĕ-ха ун чухне. Вăл вара суйлава кая юлнă пекех тыткаларĕ хăйне. Транспорт чарăнăвĕнче вăрах тăнăшăн водителе те, кондуктора та темиçе хут сăмах лекрĕ. "Эпĕ суйлава васкатăп", - графика пăхăнни çинчен итлесшĕн те пулмарĕ хайхискер. Троллейбусран тухсан тÿрех уттине хăвăртлатрĕ хĕрарăм. Паллах, ырă пуласлăха шанса сасăлама васкарĕ вăл.
Марина ТУМАЛАНОВА.