Чăваш туйĕ - чăн-чăн театр, унăн йăли-йĕрки питĕ пуян. Апла пулин те вăл паянхи çамрăка илĕртмест. Яш-кĕрĕмпе хĕр-упраç ăна хăйнешкел, çĕнĕлĕхсем хушса йĕркелесе ирттерет. Çав вăхăтрах ытти тĕрĕк халăхĕ ĕлĕкхи туй йăли-йĕркине пăхăнать. Пирĕн те туйăн хăш-пĕр элементне чĕртсе тăратма май çук-ши?
Этем çут тĕнчепе пĕр тытăмра пурăнать. Пирĕн шухăшсене, кăмăл-туйăма такам курса, илтсе тăнăнах туйăнать хăш чухне. Чăвашсен: "Чĕлхе çине килни ума килет",- тени пур. Тепĕр чухне шухăшламасăрах начар япала "персе яратăн" та - "кĕрепле аври çамкаран пырса çатлаттарать".