«Эпир вун виçĕ çул хушшинче клуб ыйтăвĕпе ăçта кăна çитмерĕмĕр, пире пур çĕрте те пĕр япаланах калаççĕ. Анчах ĕç-пуç малалла кайни курăнмасть», - терĕ йышăну пӳлĕмĕнче Шупашкар районĕнчи Атайкасси ялĕн пуçаруллă ушкăнĕн ячĕпе Надежда Щербакова.
Красноармейски районĕнчи Пулайкассисен тунсăхлама вăхăт çук. Отставкăри милици полковникĕпе Вячеслав Александровпа унăн мăшăрĕ Регина Яковлевна пуçарнипе ялта тăтăшах тĕрлĕ мероприяти иртет.
Ялти ачасемпе çамрăксем валли вĕсем хăйсен укçипе час-часах тĕрлĕ ăмăрту йĕркелеççĕ, парнесем параççĕ. Иртнĕ канмалли кунсенче вара вĕсем Владимир Путин Президента хӳтĕлесе флешмоба тухнă. Раççей ялавĕсене вĕлкĕштернĕ. Лару-тăру йĕркеленессе çирĕп шанаççĕ Пулайкассисем.
Шупашкарпа Çĕнĕ Шупашкарти, Канашри тата Çĕмĕрлери шкулсенче 5-8-мĕш классенче пĕлӳ илекенсем нарăс уйăхĕн 28-мĕшĕнчен йăлана кĕнĕ мелпе вĕренме пуçлĕç. Дистанци мелĕпе вĕренесси хыçа юлĕ. Çакăн пек йышăну турĕç паян оперштабăн черетлĕ ларăвĕнче.
Аса илтеретпĕр: нарăсăн 14-мĕшĕнчен пуçласа 1-4-мĕш тата 9-11-мĕш классенчи ачасем шкултах пĕлӳ илме тытăннă. Шупашкарти ачасем кăрлачăн 27-мĕшĕнчен, Çĕнĕ Шупашкартисем кăрлачăн 31-мĕшĕнчен дистанци мелне куçнăччĕ.