АНЧАХ...

Инкек куçа курăнса килменни авалтан паллă. Унашкал усал вара тĕрлĕрен пулать.

Ку йĕркесенче «хĕрлĕ автан» Воронеж облаçĕнчи Çĕнĕ Усмань районĕнчи «Красинское» тулли мар яваплă обществăн тĕп усадьбинче «ташласа» Чăваш Республикинчен ĕçлеме пынисене мĕнле инкек кÿни çинчен сăмах пырĕ.

Лăпланаймасăр хваттер тăрăх унталла та кунталла утрĕ те утрĕ Света. Кĕсье телефонне аллинчен яма та пĕлмерĕ. Толик патне пĕр вĕçĕм шăнкăравларĕ. Анчах арçын хуравламарĕ. Юлашкинчен тÿсĕм пĕтрĕ-ши, мăшăрне урăхла шырама пикенчĕ.

— Итлетĕп, — ыйăхлă илтĕнчĕ лини тепĕр вĕçĕнче кумĕн сасси.

— Толикпе пĕрле мар-ши тесе ыйтасшăнччĕ... Вăратрăм иккен. Каçару ыйтатăп.

— Пĕлетĕн вĕт-ха: эпĕ унпа çÿреместĕп. Ăнсăртран пĕрре çакланни те темччен аса илмелĕх çитет. Каллех ÿсĕр пулĕ, унсăрăн хальччен таврăнмалла.

— Пĕлетĕп-ха...

— Мĕнле арçынна пĕтертĕн, Света.