Сăрпа Хусан хӳтĕлев чиккисене тума хутшăннисене халалланă астăвăм комплексĕнче территорие хăтлăлатма пуçланă. Хальхи вăхăтра унта тирпей-илем кӳрес ĕç пырать.
ЧР Ипотека корпорацийĕн представителĕ Геннадий Шелудяков каланă тăрăх, палăк тавра йывăç-тĕм лартĕç, курăк акĕç. Малтан тĕрлĕ тĕм /гортензи, дерен…/ лартĕç, вĕсем чечекленсе комплекса илем кӳрĕç. Çĕр лаптăкне хатĕрлесе пĕтерсен курăк акма тытăнĕç, вăл пĕр-икĕ эрнере шăтса тухмалла-мĕн. Тĕмсене тата курăка шăвармалли ятарлă хатĕрсем тунă.
Çĕртме уйăхĕн 1-мĕшĕнчен пуçласа Чăваш Енре шыва кĕме ирĕк парĕç. Анчах çакăн валли ятарласа уйăрнă вырăнсене çеç çӳремелле.
Ку çулла республикăра 13 пляж ĕçлĕ. Çăлавçă матроссемпе медиксем шыв хĕрринче канакансене хăрушсăрлăхпа тивĕçтерĕç. Муниципалитетсенче çу пуçламăшĕ тĕлне шыва кĕме 128 вырăн хатĕрлеме палăртнă. Шыв тасалăхне Чăваш Республикин шыравпа çăлав службин водолазĕсем тĕрĕслеççĕ.