Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев паян Шупашкар районĕнче ĕçлĕ визитпа пулчĕ. Чи малтанах вăл Арина Платоновăн хресчен-фермер хуçалăхĕн ĕçĕпе паллашрĕ.
Халăх пурнăçне лайăхлатасси наци проекчĕсен тĕп тĕллевĕ шутланать. Çак ĕç-хĕл мĕнле шайра пурнăçланать-ха? Ĕнер ЧР Пуçлăхĕ çумĕнчи стратеги аталанăвĕн тата проект ĕç-хĕлĕн канашĕн ларăвĕнче кăçалхи кăрлач-утă уйăхĕсенчи кăтартусене пăхса тухрĕç.
Раççей почтин Чăваш Енри управленине 5 çĕнĕ автомобиль килнĕ. Çулталăк вĕçлениччен тата тепĕр 14 автомобиль çитмелле.
Икĕ машинăна курьер службине уйăрса парĕç, виççĕшĕ почта урлă каякан хаçат-журнала, ытти япалана Шупашкарта турттарĕ. Автомобильсене 750 килограмм таран тиеме пулать. Вĕсене маякпа, сиренăпа тата сигнализаципе тивĕçтернĕ. Сăмах май, Раççей почтин Чăваш Енри уйрăмĕнче хальхи вăхăтра – 117 транспорт, çав шутран 8-шĕ – курьер службинче. Почта машинисен пĕтĕмĕшле маршручĕ – 12500 километр.
Республика Правительстви нумай ачаллă çемьесене пулăшас тĕлĕшпе черетлĕ утăм турĕ: Министрсен Кабинечĕн юнкун ЧР Пуçлăхĕн тивĕçĕсене вăхăтлăх пурнăçлакан Олег Николаев ертсе пынипе иртнĕ ларăвĕнче ачаллă граждансене тÿлекен патшалăх пособийĕсем çинчен калакан саккуна кĕртмелли улшăнусене ырларĕç.