Этем çут тĕнчепе пĕр тытăмра пурăнать. Пирĕн шухăшсене, кăмăл-туйăма такам курса, илтсе тăнăнах туйăнать хăш чухне. Чăвашсен: "Чĕлхе çине килни ума килет",- тени пур. Тепĕр чухне шухăшламасăрах начар япала "персе яратăн" та - "кĕрепле аври çамкаран пырса çатлаттарать".
Культурăпа халăх пултарулăхĕн республика керменĕнче "Раççей юррисем" фестиваль-марафонăн гала-концерчĕ иртрĕ. Асăннă пулăм - Раççей халăх артистки Надежда Бабкина ертсе пынипе Чăваш Енре Культура çулталăкĕнче йĕркеленĕ пысăк турне. Тăватă куна тăсăлчĕ вăл.
Кĕçех Çурхи ырă кăмăллăх эрни пуçланĕ. Шупашкарти А.Чехов ячĕллĕ вулавăш ĕçченĕсем ырă ĕç тума ăна кĕтес темен - хăйсен микрорайонĕнче пурăнакан, кĕнеке вулас текен, анчах тухса çÿреймен ватăсене хÿтлĕхе илнĕ.
Ака уйăхĕн 1-мĕшĕнче чăвашсен паллă прозаикĕ, ăсчахĕ Константин Петров çуралнăранпа 90 çул çитет. Вăл çырнă произведенисем паян та вулакана кăсăклантараççĕ.
Константин Константинович пурнăçĕпе пултарулăхĕ пирки "Хыпар" хаçатăн ыранхи номерĕнче Раççей Писательсен союзĕн членĕ Геннадий Уткин паллаштарать.
Тăвай районĕнчи Тăрмăшри çыхăну уйрăнче виçĕ почтальонка ĕçлет. Сăмахран, Анжела Бикинина Лачкассинче тата Тăрмăшра (пĕр урам) пурăнакансене хаçат-журналпа тивĕçтерет. Кунти халăх "Хресчен сасси", "Сывлăх" тата "Хыпар" кăларăмсене ытларах кăмăллать. Пенсионерсем вулама юратаççĕ. Çамрăксем хаçат-журнал çырăнмаççĕ. Çавна май ачасем те вуламаççĕ. "Ман участокра "Тантăш" çыр-накан пачах та çук", - тет вăл.
Ака уйăхĕнчен хаçат-журнал хакĕ ÿсни вулакана та пăшăрхантарать. "Çырăнакан çын хака пăхса тăмасть, - малалла сăмахлать почтальонка. - Юратнă кăларăмшăн тÿрех укçа кăларса хурать".
Тутарстанри Пăва районĕнче чылай чăваш çыравçи çуралса ÿснĕ. Вĕсен шутĕнче В. Краснов-Асли, Г. Краснов-Кĕçĕнни, В. Ахун, С. Ялавин, В. Чебоксаров. Вĕсене асăнса Кипекассипе Элшел ялĕсенче асăну хăмисем уçрĕç. Уява «Тăван Атăл», «Капкăн», «Лик» журналсемпе «Хресчен сасси», «Тантăш» хаçатсен редколлегийĕсен членĕсем хутшăнчĕç.
Тăвай районĕнчи Лаçкасси ялĕнче ал ĕç кружокĕ ĕçлет. Унта 12 çын çÿрет. Хĕрарăмсем малтанах тутăр, алса-чăлха çыхнă пулсан паян хушпу-тухья тума вĕренеççĕ. Ку енĕпе вĕсене клуб ертÿçи Зоя Семенова пулăшса пырать. Эрнере пилĕк кун çÿреççĕ вĕсем кружока.
Вера Николаева вара тĕрлеме те ăста. Вĕтĕ шăрçапа турăшсем тĕрлет вăл. Хăй валли кăна мар, тус-юлташне те парнелет. Тепĕр чух сутать те.
Турцири Эскишехир хулинче Тĕрĕк журналисчĕсен пухăвĕ иртрĕ. Унта пирĕн республикăран та калем ăстисем хутшăнчĕç. “Чăваш хĕрарăмĕ хаçат” редакторĕ Маргарита Ильина тата “Сувар” телеканал ертÿçи Олег Цыпленков йăхташăмăр-ĕçтешĕмĕрсене Чăваш Енри массăллă информаци хатĕрсем çинчен каласа кăтартрĕç.
Маргарита Ильина пирĕн республикăра сăмах чăнласах та ирĕклине, хаçат кăларас енĕпе нимĕнле чăрмав та çуккине палăртрĕ. Ахальтен мар-тăр Чăваш Енре 175 массăллă информаци хатĕрне шута илнĕ /2014 çулхи кăрлачăн 27-мĕш тĕлне/.
"Кăçал хĕл каçнине те сисмерĕмĕр", - теççĕ Çĕрпÿ районĕнчи Патăрьел ялĕнчи "Тевет" ушкăн хĕрарăмĕсем. Вĕсем хăйсен репертуарне çĕнетсех тăраççĕ. Тухса çÿремешкĕн транспорт çукки те чăрмав мар вырăнти сцена ăстисемшĕн. Уçă саслăскерсем 206-мĕш автобуспа ăçта кăна çитсе килмен-ши? "Юрласа пырсан укçа илместĕп", - водитель çапла каланине хăнăхнă вĕсем. Çавăнпа транспорта кĕрсенех концерт пуçламашкăн килтенех хатĕрленсе тухаççĕ. Чăн та, çапла майпа кирлĕ вырăна тÿлевсĕрех çитет "Тевет" ушкăн. Артистсене ытараймасăр автобусран тухакан пĕтĕм халăх киле каяс вырăнне клуба кĕрсе юлать.
Çулсем çинчи инкексен тĕп пайĕ - транспорт хатĕрĕсем çапăнни тата çуран çынсене таптани. Аварисемшĕн тĕпрен илсен водительсем яваплă: вĕсен айăпĕпе Раççейре пĕлтĕр 180 пине яхăн инкек пулнă, çав аварисенче 23 пин ытла çын вилнĕ, 235 пин çын суранланнă. Çуран çынсем нумайăн шар кураççĕ.
Чăвашла верси
Русская версия
