Архив - 5 Фев, 2016 - Хыпар

Нарăс уйăхĕн 1-мĕшĕнчен тытăнса пуш уйăхĕн 31-мĕшĕччен Раççей почти çĕршыври мĕнпур çыхăну уйрăмĕсенче 2016 çулăн II çурри валли хаçат-журнал çырăнса илмелли тапхăр пуçланни çинчен пĕлтерчĕ.

Шкул тумĕ. Мĕнлерех пулмалла унăн? Ăшă, меллĕ, хитре, паха, йÿнĕ... Паллă ячĕсен ретне малалла та тăсма пулать. Пĕлтерĕшлисен шутĕнчех - вăл ачан сывлăхне сиен кÿменни.

Чăваш Ен Пуçлăхĕн Михаил Игнатьевăн ячĕпе Тĕп çар округĕн çарĕсен командующийĕнчен Владимир Зарудницкий генерал-полковникран "пысăк яваплăхшăн, Чăваш Республикин çар комиссариатне 2015 çулхи кĕрхи призыва йĕркелесе ирттерме пулăшнăшăн” тав çырăвĕ килнине вулакансене пĕлтернĕччĕ.

Чăваш Республикин Патшалăх Канашĕн пĕлтĕрхи раштав уйăхĕн 24-мĕшĕнчи сессийĕнче халăха социаллă хÿтлĕхпе халиччен тивĕçтерсе тăнă тытăма палăрмаллах витĕм кÿнĕ икĕ документ - «Чăваш Республикин уйрăм саккун акчĕсене улшăнусем кĕртесси çинчен» тата «Чăваш Республикин ĕç ветеранĕсем çинчен» - йышăннă, раштав уйăхĕн 31-мĕшĕнче официаллă йĕркепе пичетленĕ, кăçалхи кăрлач уйăхĕн 11-мĕшĕнче вăя кĕртнĕ. Вĕсемпе килĕшÿллĕн республикăра пурăнакансене патшалăх пулăшăвĕпе 2016 çултан ятран тата вăл чăннипех кирлине тĕпе хурса тивĕçтерме тытăнчĕç.

Çапах «Хыпартан» пулăшу ыйтаççĕ

Сутлăх хак енĕпе «Хыпар» хаçат килти хуçалăхсене хÿтĕленине пирĕн вулакансем лайăх пĕлеççĕ. Çавăнпа редакцирен пулăшу ыйтаççĕ.

Кăрлачăн 25-мĕшĕнче Çĕрпÿ районĕнчи Энĕшкасси Кушкă ялĕнчи продукци сутакан хĕрарăм редакцие телефонпа шăнкăравларĕ, Андрей Альгеев предприниматель кашни килограмшăн 16-шар тенкĕ çеç тÿленине пĕлтерчĕ, сутлăх хака ÿстермешкĕн Çырмапуç ял тăрăхĕн администрацине витĕм кÿме ыйтрĕ. Хушамачĕпе ятне пĕлтермерĕ.

Ĕне усракансемшĕн 2015 çул республикăри нумай килти хуçалăх сутакан сĕт пахалăхĕ лайăхланнипе, ăна ветеринари-санитари йĕркине пăхăнтарнипе те палăрса юлчĕ. Ял çыннисенчен ытларахăшĕ продукцие аванлатассишĕн ĕнене тĕрĕс çитерме, паха сĕт çеç сутма тăрăшать. Ку енĕпе вырăнти хăйтытăмлăх органĕсемпе ветеринари специалисчĕсем ырă сĕнÿсем параççĕ. Çапах та чылай хуçалăх сутакан продукци пахалăх кăтартăвне тивĕçтермест. Сăлтавĕ - унта шыв хушнинче, сĕт тытăмĕ нормăна тивĕçтертĕр тесе выльăх организмне кирлĕ апат куллен çитерменнинче, гигиенăна пăхăнманнинче.

Федерацин республикăри М-7 çулĕпе куллен çÿрекенсем ăна автогрейдерсемпе юртан тасатнине, КДМ машинăсемпе хăйăр-тăвар сапнине, трассăна йĕркелеме хутшăнакан вун-вун ытти техника хатĕрне асăрхаççĕ. Вĕсем - Чăваш Енри тĕп çула пăхса тăракан «Воддорстрой» обществăн.

2016 çул - Раççей Федерацийĕнче Кино çулталăкĕ. Çакна çирĕплетекен указа РФ Президенчĕ Владимир Путин 2015 çулхи юпа уйăхĕн 7-мĕшĕнче алă пуснă. Документра палăртнă тăрăх - Кино çулталăкне общество "кăмăлне" кинематограф енне çавăрас тĕллевпе ирттереççĕ.

Шупашкар кинофестивалĕн президенчĕ Карен Шахназаров палăртнă тăрăх - «нацин хăйнеевĕрлĕх ăнланулăхне аталантаракан пĕлтерĕшлĕ паллăсенчен пĕри вăл - унăн кинематографĕ пурри». Чăваш киновĕн кун-çулĕ иртнĕ ĕмĕр пуçламăшĕнчех хăй пурри çинчен пĕлтернĕ.