Архив - 27 Мая, 2016

Çу уйăхĕн 23-мĕшĕнче Чăваш Ен Пуçлăхĕ Михаил Игнатьев "Раççей чукун çулĕсем" АУО президенчĕпе Олег Белозеровпа курнăçнă. Ĕçлĕ тĕлпулура Чăваш Енри предприятисем РЖД валли туса кăларакан продукци номенклатурине анлăлатассине, çавăн пекех пирĕн предприятисемпе организацисем пысăк хăвăртлăхлă Мускав-Хусан магистраль строительствин инвестици проектне хутшăнассипе çыхăннă майсене сÿтсе явнă.

Ытларикун Чăваш Ен Пуçлăхĕ Михаил Игнатьев Федерацин наркотиксен çаврăнăшне тĕрĕслесе тăракан службин республикăри управленийĕн сотрудникĕсене савăнăçлă лару-тăрура чыслама хутшăннă.

Михаил Игнатьев право хуралĕн тата влаç органĕсем, граждан обществи тачă çыхăну тытса ĕçленĕ май республикăра юлашки çулсенче наркоманипе чирлесси Атăлçи округĕнчи тата Раççейри вăтам шайран пĕчĕкреххине палăртнă. Анчах çакă — лăпланмалли сăлтав мар, малашне те çине тăрса ĕçлемелле.

Айккинчен пăхсан — парад иртет тейĕн, тĕрĕссипе вара Шупашкарти 14-мĕш шкул вĕренекенĕсем — тĕттĕм кăвак кительлĕ, пилоткăллă хĕрсемпе яшсем, шкул картлашки çине тин ярса пуснă шăпăрлансемпе вĕсенчен аслăрах ÿсĕмри ачасем — «юлашки шăнкăрава» халалланă линейкăна пухăннă. Вĕсем кăна-и? Кĕç-вĕç сывпуллашма хатĕрленекен кадетсене вĕренсе пĕтернĕ ятпа саламлама шкулăн пĕтĕм ĕçченĕ, ашшĕ-амăшĕ пуçтарăннă.

Транспорт тата çул-йĕр хуçалăхĕн министрĕ хăй ертсе пыракан тытăмăн 2015 çулхи ĕçĕ-хĕлĕ çинчен отчет тунине кура Министрсен Кабинечĕн юнкунхи ларăвĕнче çулсене тытса тăрас, аталантарас, пассажирсене илсе çÿрессине тивĕçтерес ыйтусем тĕп вырăнта пулчĕç. Ку сферăра ыррипе пĕрлех пăшăрхантаракан самант та чылай.

«Единая Россия» политика партийĕн суйлав умĕнхи сасăлавне Чăваш Енри суйлавçăсем хастар хутшăннă: РФ Патшалăх Думипе — 14,79%, ЧР Патшалăх Канашĕпе — 20,38%.

Ку — Раççейри чи пысăк кăтартусенчен пĕри.

Стоматологи сывлăхне хÿ­тĕлемелли тытăм, сывă пурнăç йĕркине пăхăннă тата шăл чирĕсене профилактикăлакан мелсемпе усă курнă май, шăл-çăвара йĕркеллĕ тытса тăма пулăшать. Тĕслĕхшĕн фтор хушнă сĕте илер.

Раççейри предпринимательлĕх кунĕ умĕн РФ Пенси фончĕ «2015 çулхи чи лайăх страхователь» конкурсра мала тухнисене чысланă. Палăртма кăмăллă, вĕсен йышĕнче Чăваш Республикин тăватă предпринимательне дипломсемпе наградăланă.

Çĕнтерÿçĕ ятне Шупашкар хулинчи Владимир Максимов /лакпа сăрă изделийĕсен производстви/, Красноармейски районĕнчи Олег Кусков /автомобильсене техника тĕлĕшĕнчен пăхса тăрасси тата юсасси/, Шупашкар районĕнчи Иван Антонов /вак суту-илÿ/ тата Сĕнтĕрвăрри районĕнчи Александр Федоров /хресчен-фермер хуçалăхĕ/ тивĕçнĕ.

Ĕнер Чăваш патшалăх академи драма театрĕнче Раççей предпринимательлĕх кунне халалланă савăнăçлă уяв иртрĕ. Пухăннисене Чăваш Ен Пуçлăхĕ Михаил Игнатьев усламçăсен çĕршывра 2008 çултанпа иртекен праçникĕ ячĕпе саламласа пайтаçăсен теветкеллĕхне палăртрĕ. Хăйсен шухăшне пурнăçлас тесе укçи-тенкине шеллемеççĕ, кредит илеççĕ, анчах производствăна аталантараççех. Çапла тума кашниех пултараймасть. Хăшĕсем 20-25 çул каяллах ĕçе кÿлĕннĕ, теприсем — пĕлтĕр е кăçал.

Çапла палăртаççĕ Чăваш Республикин Вĕренÿпе çамрăксен политикин министерствинче. Патшалăх пĕтĕмлетÿ аттестацийĕ çу уйăхĕн 26-мĕшĕнче пуçланчĕ. Вăл çĕртме уйăхĕн вĕçĕчченех тăсăлĕ.

Ăна йĕркелесси пĕтĕмĕшле илсен хальчченхи йĕркепех иртет пулин те çĕнĕлĕхсем пур. Сăмахран, кăçал экзамен ирттерме палăртнă пур пунктра та /вĕсем — 36/ онлайн-сăнав йĕркелĕç, выпускниксене ППЭ вăхăтĕнче Раççейри тата Чăваш Республикинчи лару-тăру центрĕсем сăнама пултарĕç. Сăмах май, çак кунсенче видеотрансляци тытăмĕн хăватне тĕрĕслесе пăхнă. Тест ăнăçлах иртнĕ.