Журналистсем - Каçал çĕрĕнче

Каçал ен - издательство çуртĕнче ĕçлекен чылай çыншăн çуралнă тăван кĕтес. Директор-тĕп редактор Валерий Туркай та, унăн заместителĕ Геннадий Максимов та çак тăрăхра çуралса ÿснĕ. Журналистсен йышĕнче те Комсомольскинчен тухнисем сахал мар. Чылайăшĕ кĕçнерникун ентешĕсемпе тĕлпулма çула тухрĕ.

"Хыпарпа" тата унăн кăларăмĕсемпе паллаштарнă май редактор хаçат 110 çулхи юбилейне паллă тунă çĕре тăван тăрăхра хаçат тусĕсем чакмасса, пушшех те йышланасса шаннине систерчĕ. Геннадий Аркадьевич та çакăн пиркиех калаçрĕ, ентешсене шаннине пĕлтерчĕ.

Кашни хаçат-журналăн представителĕ вулакан йышĕ ÿсессе кĕтнине систерчĕ. Çĕнĕ технологисем аталанаççĕ пулин те алăпа тытса вулани пархатарлăраххине каларĕ.

Пичет кăларăмĕсен паха енĕсене район администрацийĕн пуçлăхĕ Михаил Афанасьев та палăртрĕ.

- Хаçатра вуланине, телекуравпа тата радиопа курни-илтнипе танлаштарсан, хăть те хăçан та тепĕр хутчен тишкерме пулать, - терĕ Михаил Романович.

Тĕлпулăва пухăннисен кăмăлĕсене хăпартса Клара Осокинăпа Вячеслав Вахтеркин илемлĕ юрăсемпе савăнтарчĕç.

Татьяна НАУМОВА.