«Ялта ĕç çук теекене ăнланмастăп эпĕ, - калаçăвне пуçларĕ Валерий Ермолаев хурт-хăмăр ăсти. - Ĕçлес шухăшлă çыншăн вăл çителĕклех. Тĕрĕссипе, çывăрма та вăхăт çук».
Вăл çак ĕçре 24 çул тăрăшать. Ял-йышпа, шкул ачисемпе тĕл пулса хăйĕн опычĕпе паллаштарать. Ытти çын та вĕлле хурчĕ ĕрчетсе тупăш илтĕр тесе тăрăшать. Мĕн тĕллевпе-ха? Çамрăксем çуралнă тăрăхра юлччăр, тăван çĕре юратчăр тесе.
Çирĕме яхăн ăратлă чăх-чĕпе музейри пек пăхса ытараймастăн. Канаш районĕнчи Ухманри Даниловсен хушма хуçалăхĕнче вĕсем çак вăхăтра уйрăм читлĕхсенче тăраççĕ, тĕрлĕ сас параççĕ. "Дзержинский гигант" йышши хальччен курманран мана та тĕлĕнтерчĕ. Чăхĕ те, автанĕ те темĕн çÿллĕш.
Унăн кил картишĕ кăна мар, пахчи те кайăк-кĕшĕк пасарне аса илтерет. Мĕн тĕрлĕ сасă кăна илтместĕн. Акă Африкăпа Австрали страусĕсем хăйсен чĕлхипе янăрашаççĕ. Ют çын умĕнче аçи ташласа кăна тăрать: те хуçине вăрçать, те савăнать. Эму кӳлепипе ытти страуспа танлашаймасть, анчах вăл та хăйнеевĕрлĕ. "Инди чупавçисем" тесе ахальтен палăртман кăвакалсен çĕнĕ ăратне. Этем пек хырăмне каçăртса çӳреççĕ, чупнă чух вĕсене хăваласа çитеймĕн. Ытти йышши илемлĕ кайăк-кĕшĕкпе чăх-чĕп, выльăх пирки калама та кирлĕ мар. Вуншар тĕрлĕ вĕсем.
Елчĕк районĕнчи Аслă Елчĕк ялĕнче пурăнакан Зоя Николаевнăпа Владимир Андреевич Мурзакаевсем патĕнчен халăх татăлмасть тейĕн. "Паян ирхине пĕри ултă банка сĕт илсе кайрĕ", — терĕ кил хуçи хĕрарăмĕ. Нумай та пулмарĕ — тепри çитсе тăчĕ. Вăл та сĕт туянасшăн иккен.
"Вĕçĕмсĕр выльăх пăхатăн. Кала-ха, канма ăçта кайнă эсĕ? Ют çĕршыва курса кил-ха пĕрре", - çине тăрсах сĕнет хĕрарăма Патăрьел районĕнчи Арапуç ял тăрăхĕн пуçлăхĕ Владимир Алексеевич Секретов. "Пĕр эрне никам чăрмантармасан килте те эпĕ чикĕ леш енчи пекех канатăп", - сăмах хушать лешĕ.
Чăвашла верси
Русская версия
