Ĕçлĕ визитпа Çĕмĕрлере пулнă

Чăваш Ен Пуçлăхĕ Михаил Игнатьев ĕçлĕ визитпа Çĕмĕрлере пулнă май хулари чи проблемăллă объектра - халăха таса шывпа тивĕçтерекен тата каяшсенчен тасатакан сооруженисене çитсе курнă.

Республика Пуçлăхĕ предприятие модернизацилемелли инвестици программипе ĕçлессине хăвăртлатма кирлине палăртнă. «Шупашкарсен опытне тишкерсе объекта ку чухнехи требованисемпе килĕшÿллĕн юсамалла. Модернизаци хыççăн тарифсем ан ÿсчĕр тесен энерги перекетлекен оборудовани вырнаçтарсан лайăхрах пулмалла», - тенĕ Михаил Игнатьев.

Ун хыççăн республика Пуçлăхĕ хула ертÿлĕхĕпе, хула Пухăвĕн депутачĕсемпе тата Çĕмĕрле хулин общество хастарĕсемпе тĕл пулнă. Хулан бюджет шайлашулăхне тата социаллă пурнăçпа экономикăн пĕр тикĕс аталанăвне тивĕçтерес ыйтусене сÿтсе явнă çĕре çавăн пекех Чăваш Республикин Министрсен Кабинечĕн Председателĕн заместителĕ - строительство, архитектура тата пурăнмалли çурт-йĕрпе коммуналлă хуçалăх министрĕ Олег Марков, экономика аталанăвĕн, промышленноçпа суту-илÿ министрĕ Владимир Аврелькин, республикăн Патшалăх Канашĕн депутачĕ Валерий Шигашев хутшăннă.

Канашлăвăн кун йĕркине пăхса тухиччен Чăваш Ен Пуçлăхĕ вăрçă тата тыл ветеранĕсене «Тăван çĕршывăн Аслă вăрçинче Çĕнтерÿ тунăранпа - 70 çул» юбилей медалĕсем, ĕçре палăрнă хастарсене професси ĕçĕ-хĕлĕнче тунă çитĕнÿсемшĕн тав хучĕ тата сехет парнеленĕ.

Хăйĕн сăмахĕнче республика Пуçлăхĕ хула пурнăçне тивĕçтересси тата маларахри визитсем вăхăтĕнче палăртнă ыйтусене татса парасси çинче чарăнса тăнă. Тĕпрен илсен, патшалăх программисене пурнăçа кĕртсе тивĕçлĕн ĕçлеççĕ. Анчах та пурăнмалли çурт-йĕрпе коммуналлă хуçалăх ыйтăвĕсем - çав-çавах çивĕч. Республика Правительстви Çĕмĕрле хулин администрацине пурăнмалли çурт-йĕрпе коммуналлă хуçалăх ыйтăвĕсене татса пама пулăшас енĕпе мерăсем йышăнать пулин те, хулара коммуналлă организацисен топливăпа энерги ресурсĕсемшĕн тÿлемелли парăмĕсем ÿссех пыраççĕ. Çавăнпа лару-тăрăва лайăхлатма татăклă мерăсем йышăнмалла.

«Пĕлтĕр картишсене пăхса çаврăнса пĕр кун ирттертĕмĕр. Хулара пурăнакансем нумай ыйту хускатрĕç, эпир вĕсене пурнăçланине сăнасах тăратпăр. Хăшпĕрне татса панă, теприсемпе ĕçлеççĕ. Анчах та хула влаçĕсем куçран вĕçертнĕ ыйтусем те пур. Сăмаха тытмаллах», - палăртнă республика Пуçлăхĕ.

Хулана вăл ытти муниципалитетпа танлашма чĕнсе каланă. «Чăваш Республикин виçĕ хули - Улатăр, Çĕнĕ Шупашкар тата Канаш - федерацин монохуласене пулăшмалли программине хутшăнаççĕ. Çавна май вĕсене аталантарма пысăк укçа-тенкĕ параççĕ. Çĕмĕрлере хула администрацийĕн должноçри хăшпĕр çынни лару-тăрăва пăхса кирлĕ пек хаклани курăнмасть. Çакнашкал ĕçлесен аталану валли уйăракан укçа-тенкĕпе усă курмасăр юлас хăрушлăх пур. Çынсем хула влаçĕсем тивĕçлипе ĕçлессе кĕтеççĕ», - тенĕ вăл.

Тĕлпулура çавăн пекех юхăнчăк çуртсенче пурăнакансене куçарас ыйтусене тĕплĕн тишкернĕ. Çак ĕç подрядчик айăпĕпе тăсăлса кайнине палăртнă. Республика Пуçлăхĕ хула администрацине муниципалитет унитари предприятийĕсен финанспа хуçалăх ĕçне тĕрĕслессине вăйлатма сĕннĕ.

Строительство министрĕ Олег Марков 2014 çулта хула пурăнмалли çурт-йĕр тăвас енĕпе планпа пăхнă кăтартусене пурнăçламаннине, çулталăкри плана 85% çеç тултарнине палăртнă.

А.ВАСИЛЬЕВА