Архив - Фев 2015

Раççей Федерацийĕн Правительствин 2015 çулхи январь уйăхĕн 22-мĕшĕнчи «Раççей Федерацийĕн субъекчĕсен бюджечĕсене ĕç рынокĕнчи кăткăслăха сирес тĕллевпе халăха ĕçпе тивĕçтерес тытăмра хушма мероприятисене пурнăçа кĕртмешкĕн федераци бюджетĕнчен 2015 çулта субсиди уйăрса парасси тата валеçесси çинчен» йышăнăвĕпе килĕшÿллĕн Чăваш Республикин Министрсен Кабинечĕн хушăвĕпе Чăваш Ен Халăха ĕçпе тивĕçтерекен патшалăх служби кăçал ĕç рынокĕнчи кăткăслăха сирес тĕллевпе халăха ĕçпе тивĕçтерекен тытăмра ирттермелли хушма мероприятисен программине хатĕрлеме тытăннă.

"Раççей ялхуçалăх центрĕ" федераци патшалăх бюджет учрежденийĕн Чăваш Енри филиалĕнчен пĕлтернĕ тăрăх - февралĕн 1-мĕшĕ тĕлне республикăри аграрисем пĕрчĕллĕ тата пăрçа йышши культурăсене вăрлăх тума 48,6 пин тонна /102%/ хатĕрленĕ /Элĕкпе /97%/ Çĕмĕрле /75%/ районĕсем плана тултарайман/. Çураки валли 30,6 пин тонна /64%/ тасатса кондицие лартнă.

РФ Наркотĕрĕслев службин Чăваш Енри управленийĕн пуçлăхĕ Евгений Барсуков генерал-майор массăллă информаци хатĕрĕсен ĕçченĕсемпе тĕл пулчĕ, ведомствăн 2014 çулхи ĕçĕ-хĕлĕпе паллаштарчĕ, журналистсен ыйтăвĕсене хуравларĕ.

Николай Григорьевич Ванеркин шавлă уявсене питех кăмăлламасть. Паллă кунсенче чи çывăх юлташсемпе, тус-тăванпа пĕрле пухăнса шăкăл-шăкăл калаçса ларнине мĕн çиттĕр. Тăван-пĕтенĕ Вăрмар районĕнчи хăй çуралнă Вăтакасра та, чылай çул ĕçлесе пурăннă Муркаш тăрăхĕнче те сахал мар.

ЧР Пуçлăхĕ пĕлтĕр ялхуçалăх ĕçченĕсен Çĕрпÿ районĕнчи Сăнав поселокĕнче иртнĕ канашлăвĕнче экономикăпа социаллă пурнăç аталанăвĕнче ÿсĕм тунă район-хулан пуçлăхĕсене çеç кăçалхи суйлав кĕрешĕвне кĕрсе çĕнтерме ырă сунассине систерчĕ. Кăçал вĕсен ĕçне лайăхрах та хакласси куçкĕрет. Етĕрне районĕ 2014 çула мĕнле вĕçленĕ-ха?

Хĕллехи сунар тапхăрĕ вĕçленмен-ха. Февраль уйăхĕн 28-мĕшĕччен саккунпа килĕшÿллĕн çак чĕрчунсене тытма ирĕк панă: тилĕ, енот йытти, кашкăр, ондатра, Европа хăнтăрĕ, Америка шашки, пакша, сăсар, вăрман пăсари, шăши юсĕ. Кайăкçăсем йĕркене пăхăнаççĕ-и? ЧР чĕрчун тĕнчин объекчĕсемпе вăл пурăнакан вырăна сыхлас, тĕрĕслес тата чĕрлĕхпе усă курассине йĕркелес енĕпе ĕçлекен патшалăх службин ертÿçи Владимир Николаевич КУЗЮКОВ хуравлать.

Семен Матвеевич Ислюков хăйĕн пурнăçĕпе ĕçĕ-хĕлĕ çинчен ятарлă асаилÿсем хăварман. Çапах хăй виличчен пурнăçĕнчи пĕлтерĕшлĕ самантсем çинчен «Аиф-Чувашия» кăларăмра каласа кăтартма килĕшнĕ.

С.М.Ислюков çуралнăранпа 100 çул çитнĕ май

Капмар Шупашкарăн тĕп урамĕсенчен пĕри - Ленинград урамĕ. Вăл Я.Ухсай ячĕллĕ Культура керменĕ тĕлĕнчен пуçласа аялалла, Атăл хĕрринелле, залива çити тăсăлать. Çак урамри çуртсенчен пĕрин çинче Асăну хăми пур. Вăл аякранах курăнать. Унта шĕкĕр хуламăр çине, Чăваш театрĕн мăнаçлăн курăнса ларакан çурчĕ çине вичкĕн куçĕсемпе шухăшлăн тинкерекен çыннăн барельефне вырнаçтарнă. Аялта чăвашла тата вырăсла çапла çырса хунă: «Çак çуртра 1964-1998 çулсенче Чăваш Енри патшалăхпа обществăн паллă деятелĕ С.М.Ислюков пурăннă

Хĕрлĕ Чутай районĕнче çуралса ÿснĕ виçĕ çын - Алексей Анисимович Захаров сержант /Шулю ялĕ/, Степан Павлович Плисов радист /Ишеккасси/, Иван Николаевич Коннов сержант /Штанаш/ - Флеров ертсе пынă "Катюша" батарейинче çапăçнă.

Çĕнĕ Шăхранта пурăннă Яковлевсен çемйинче ывăл хыççăн ывăл çуралнă. Пурне те пурнăç çулĕ çине кăларнă Дария Осиповнăпа Василий Яковлевич. Кашни ачиех çар службинче пулнă. Ĕçе пурте пĕчĕкренех кÿлĕннĕ. Каярах пĕрисем хулара заводсенче ĕçленĕ, теприсем - тăван колхозра. Ашшĕ, Василий Яковлевич, хăй вăхăтĕнче Волынски полкра хĕсметре тăнă, çакна çирĕплетсе ăна ятран çырнă паллă та панă. Салтакра, выçлăх çулĕсенче сывлăхĕ хавшанăран вăл 1936 çулта пурнăçран уйрăлнă.