Çак сăн ÿкерчĕке 1914 çулсенче Санкт-Петербургра тунă. Унта ентешсем те пур. Сăмахран, Кĕчкей вулăсĕнчен. Çапăçури тусĕсемпе пĕрле историн хаклă реликвийĕнче манăн асатте, империализм тата граждан вăрçине хутшăннă унтер-офицер Максим Иванович Иванов та сăнарланнă. Ыттисем камсем-ши? Тен,тăванĕсем палласа илĕç?..
Пионерсен хастарлăхĕ нихăçан та асран тухас çук. Вĕренÿре кăна мар, пур ĕçре те тĕслĕх кăтартнă вĕсем, çĕр-шыва юрăхлă пулма тăрăшнă. Çирĕп воспитани илнĕскерсем кайран та пурнăçра çухалса кайман.
Çапларахчĕ пирĕн ял лавкки умĕнче иртнĕ ĕмĕрĕн 60-мĕш çулĕсенче.
Халăх «Энĕш хумĕсем» литхаçатăн черетлĕ кăларăмĕпе паллашма чарăннă. Хаçата 14 çулти Владимир Пырков илемлетнĕ, унран та кĕçĕнрех Валерий Скворцов сăн ÿкерчĕксемпе пуянлатнă. Юнашар «Çар листокĕсем» вырăн тупнă.
Çак ÿкерчĕке 1964 çулта тырă пуçтарнă чух тунă. Сулахайри - Андрей Геращенко, 1922 çулта Брянск облаçĕнче çуралнăскер. Аслă вăрçăра нимĕç фашисчĕсемпе çапăçнă. Фронтра Шупашкар районĕнчи Сарапакасси ялĕн хĕрĕпе Иринăпа паллашнă. Çĕнтерÿпе таврăнсан вĕсем унта пурăннă.
"Чăваш хĕрарăмĕ" хаçатра ĕçлекенсем, сывлăх сунатăп. Сирĕн пата Элĕк районĕнчи Ураскилт салинчи 8 ача амăшĕ çырать. Кивĕ сăн ÿкерчĕк ярса паратăп, ăна пичетлессе шанатăп. Вулакансене хамăн пурнăç çинчен каласа кăтартас килет.
Чăвашла верси
Русская версия
