Калав

13 May, 2020

Сарă чечек - уйрăлу палли

Пуйăс тарăн ыйхăран вăраннă улăп евĕр туртăнса илчĕ те хашлатса майĕпен вырăнтан тапранчĕ. Пĕр хушă такам тытса чарасран шикленнĕн йăпшăнса пычĕ, кайран вара шăна-пăванран таракан выльăх пек ĕрĕхсе малалла ыткăнчĕ. Çĕрпе пĕлĕт пĕрлешекен тĕлте телей тупасса шанчĕ тейĕн.
Хĕрÿ хĕвел питтинче хăватпа тулакан Ташкент хыçа тăрса юлчĕ. Ырми-канми пуйăсăн юлашки чарăнăвĕ — сулхăн Хусан — çывхарнăçемĕн çывхарать.

13 May, 2020

Лешка

Павăл аттене тытма ирхине килчĕç. Пилĕк сехет те çитменччĕ-ха. Малтан кил умĕнче машина кĕрлевĕ илтĕнчĕ, унтан – алăк умĕнче такамсем калаçни. Кун пек ĕçе яланах ирпе тунине пĕлет вăл, çавăнпа тĕлĕнмерĕ. Чунĕнче çапах та пĕчĕкçĕ шанăç хускалса илчĕ: «Вĕсем мар пуль. Вĕсем пулсан та, ун патне мар пуль...» Такамсем алăка хыттăнах кĕмсĕртеттерме пуçласан çав пĕчĕк шанăç та пач çухалчĕ. Вĕсемех. Ун патнех килнĕ.

13 May, 2020

Хинган шуçăмĕ

Лидия Архиповна шартах сиксе вăранчĕ. Кам чĕнчĕ çак ăна? Шăппăн та вăрăммăн ятранах чĕнчĕ: «Ли-и-и-да». Тулта çапса çумăр çăвать. Пÿрт тăрринче чăрсăр тумламсем ташлаççĕ. Пĕчĕк хрущевкăра тĕттĕм, куçран чиксен те нимĕн те курăнас çук. Çук, Лидия Архиповнăна никам та чĕнме пултарайман. Вăл тăрса ларсан кивĕ урай хăми чĕриклетсе илчĕ — çавă çеç.

18 Mar, 2020

Йăмра

Йывăр пулсан та паян Андрей ытти кунсенчен иртерех вăранчĕ. Мĕн тăвас тетĕн, юрăри пек — институт, экзаменсем, сесси вĕт... Çитменнине, вăл пачах та хатĕр мар. Унăн ХХ ĕмĕрĕн 60-70 çулĕсенчи чăваш литературипе экзамен тытмалла. Ĕнер тата çуралнă кунра пулнă. Унта лайăх савăннă, ĕçнĕ-çинĕ. Паллах, çитмен. Тата кайса илнĕ, ыттине астуманпа пĕрех. Ĕçе-ĕçе карланки те кĕрĕк çанни пысăкăш пулса кайнă пуль...

19 Ноября, 2019

Шурă анчăк

Пирĕн ялти Жантай кинемей çинчен илтмен çын çук та пулĕ таврара. Унăн тĕлĕнче яланах çынсем пухăнса тăнине курма пулать. Укăлча умĕнче ют машина е кутамккаллă çул çÿревçĕ курăнчĕ пулсан вăл Жантай кинемей патне çул тытни пирки иккĕленмесĕрех калама пулать. Эпĕ хам миçе хутчен çул кăтартса янă çавăн пеккисене: мечĕтрен масар еннелле утмалла, ял хĕрринче улăм витнĕ пĕчĕк пÿрт ларать. Çак пÿрт тăрри – ялта пĕртен-пĕрре. Çак тăрă айĕнче пурăнать те ĕнтĕ Жантай карчăк. Килнĕ çын ăнланманнискер пулсан хăш-пĕр чухне ăна тĕплĕрех каласа пама тивет.

Pages