Чăваш Енре коронавируспа чирлекенсен шучĕ ÿснине кура ЧР Пуçлăхĕн тивĕçĕсене вăхăтлăх пурнăçлакан Олег Николаев ытларикунран инфекци сарăлассипе кĕрешмелли мерăсене тата та вăйлатрĕ.
ЧР Юстици тата пурлăх хутшăнăвĕсен министерствин «Чăваштехинвентаризаци» бюджет учрежденийĕн ятне улăштарассине хăвăрт татса пачĕç. Çакă министерство ячĕ улшăннипе кăна çыхăннă. Çавăнпа ĕнтĕ финанс министрĕ Михаил Ноздряков çакнашкал учрежденисен ячĕсенче министерство ятне палăртнин вырăнлăхне тишкерме сĕнчĕ. Çакăнпа Олег Николаев та килĕшрĕ.
Ĕçлев министрĕ Алена Елизарова ялти специалистсене коммуналлă пулăшу ĕçĕсен тăкакĕсене /çав шутра — çурт-йĕре хутса ăшăтмашкăн вутă туянмалли тăкаксем те/ саплаштарса паракан тӳлеве индексацилесси çинчен пĕлтерчĕ.
Саплаштару виçи 12% яхăнах пысăкланать — 1181 тенкĕпе танлашĕ. Çак укçана илекенсем — 15,2 пине яхăн çын. Ялти специалистен шутне ялта вăй хуракан медиксем, учительсем, культура, социаллă сфера ĕçченĕсем, ветеринарсем кĕреççĕ.
Кирек мĕнле пулсан та коронавирус ытти ыйтăва айккине сирмест — вĕсемпе те çине тăрса ĕçлемелле.
Юнкунхи ир тĕлне республикăра чирлисен шучĕ 16 çынпа танлашнă. Пĕр çын, чи малтан тупса палăртни, сывалнă. 795 çынна медиксем сăнаса тăраççĕ. Çак йышри 693 çын — килĕсенчех, ыттисем вара медстационарта тата обсерваторта.
Чăвашла верси
Русская версия
