Арçын куçĕпе

Британи философĕн, экономисчĕн Адам Смитăн «Халăхсем пуясси епле пуçланнине тĕпчесе пĕлни» экономикăна пуçарса яракан пĕрремĕш ĕç шутланать. Унта автор «куçа курăнман алă» пур тесе ĕнентерет. Вăл «хуçине» тухăçлă ĕçлеме пулăшнă май обществăна та усă кÿрет имĕш. Ку, паллах, кирек хăш тытăма та пырса тивет. Çапах та ял хуçалăхри «куçа курăнман алă» паян ытларах çынсен яваплăхĕ, тăван çĕре хаклама пĕлекенĕн чун ыратăвĕ çинче тытăнса тăрать. Пĕтĕм ĕçе мотоблокпа, лашапа /тĕрĕссипе, вĕсем çукпа пĕрех халĕ/ е алă вĕççĕн туса пĕтереймĕн. Ирĕксĕрех трактор-машинăллă çынран пулăшу ыйтма тивет. Теплицăсемпе йĕркеллĕ усă курас тесен те самай тар тăкмалла.