Петĕр ЯККУСЕН: Ан сивле тĕнчене...

КИЛ

Эй, тем те куртăм,

тем те мантăм, —

Чĕре варне вырнаçнă пуль:

Çав кил. Çав пÿрт.

Çав пилĕк кантăк.

Кăштах саралнă шурă тюль.

Çунат сарма самант çитет те —

Инçе çул-йĕр тухать ума.

Каймашкăн йÿнĕ те билечĕ, —

Пит хаклă, хаклă таврăнма.

Ăçта пуç чикĕн, мĕн эс тăвăн?

Каç-каç куçа хупса выртсан

Силлет, лăскать чунра

çил-тăвăл

Тăван кил еннелле туртса.

Вара пĕтет ура тĕревĕ,

Сисетĕн: япăх ĕç-пуçсем...

Пыма чĕнеççĕ çăлтăр евĕр

Кил маччинчи

турат куçсем.

...Таçти ют хулара вăрантăм:

Юхать иккен куçран куççуль.

Çав кил. Çав пÿрт.

Çав пилĕк кантăк.

Кăштах саралнă шурă тюль.

ТУТИ ВĔРИ

ПЫЛАК КĂВАРЧЧĔ

Тути вĕри пылак кăварччĕ

Чуптунăран, вăтаннăран...

Пире нумай та кирлĕ марччĕ,

Кив пальтопа — çав ытамра.

Мĕскер калаçнă, чĕвĕлтетнĕ,

Мĕне шанса та ĕненсе?

Ун чух эпир телей те кĕтнĕ —

Телей хыçра иккен, инçе.

Çапла вăл çамрăклăхăн ирĕ:

Вĕри, пылак, аса илсен.

Пире нумай-нумай

халь кирлĕ —

Кăвар пек мар çеç тутасем. 

Малалла вулас...

Комментари хушас

Image CAPTCHA
Введите символы, которые показаны на картинке.