Комментари хушас

Шкулсенче экзаменсем вĕçленчĕç — вĕсен кăтартăвĕсемпе Чăваш Республикин вĕрентÿ министрĕ Александр Иванов паллаштарчĕ. 11-мĕш классем — 5,8 пин, 9-мĕшсем 11,7 пин ытла яшпа хĕр экзамен тытнă. Ку йыш пĕлтĕрхинчен самай пысăкрах.

Тĕрĕслев çирĕп пулнă. Сăнавçăсен йышĕ кăна 110 çынпа танлашнă. Çав шутра — Мускавран килнĕ сăнавçăсем те. Йĕркене пăснă икĕ теçеткене яхăн тĕслĕхе тăрă шыв çине кăларнă. Патшалăхăн пĕрлехи экзаменĕнчи çакнашкал 9 тĕслĕхрен пурте тенĕ пекех кĕсье телефонĕпе, шпаргалкăпа усă курнипе çыхăннă.

«Йĕркене пăснисем халь суйласа илнĕ предметсен экзаменĕсене çитес çул кăна тытма пултарĕç, ытти предметпа — кĕркунне. Çавăнпа эпир маларахах ачасемпе çине тăрса ĕçленĕччĕ — йĕркене пăсма юраманни пирки асăрхаттарнăччĕ», — кăçал çакнашкал тĕслĕх сахалраххин сăлтавне уçăмлатрĕ министр.

Кăтартусене илес тĕк — ППЭ тĕлĕшпе 100 балл пухнисен йышĕ ÿсни савăнтарать: историпе — 4, химипе — 6, вырăс чĕлхипе 32 çын ĕçĕ çакнашкал чи пысăк хаклава тивĕçнĕ. Министр хăйĕн сăмахне шкулсенчен вĕренсе тухакансем валли республикăри аслă вĕренÿ заведенийĕсенче кăçал 3,2 пине яхăн бюджет вырăнĕ пулассине çирĕплетнипе вĕçлерĕ.