Комментари хушас

Тăххăрмĕш класри Таня Феоктистова чылай енпе пултаруллă. Ăна кăçал шкул президентне суйланă. Ахальтен мар паллах. Кĕçĕн классенченех вĕренÿ отличници, спортпа туслă, шкул пурнăçĕнче хастарлăхпа палăракан, конкурс-олимпиадăсене тăтăшах хутшăнакан пике чылай вĕренекеншĕн тĕслĕх вырăнĕнче.

Президент тивĕçĕсен шутне мĕн-мĕн кĕрет-ха? Унăн шкул «министрĕсене» пулăшмалла, пĕрле конкурс-мероприятисем йĕркелемелле, пĕр-пĕр уяв умĕн шкул стенисене илемлетме плакатсем те ÿкермелле. Çак яваплăха Таня çăмăллăнах тата кăмăлтан пурнăçлать. «Хальлĕхе ку тĕлĕшпе кăткăслăхсем сиксе тухман-ха», — тет вăл йăл кулса. Тантăшĕсемпе вĕрентекенсем пулăшса пыни те хавхалантарать ăна.

Шкул пурнăçĕ интереслĕ. Вăл тĕрлĕ пулăмран пуян. Çакă уйрăмах килĕшет Таньăна. 1-мĕш класранах «Калинка» халăх ташши ансамблĕнче ăсталăхне аталантараканскер çак енĕпе чылай конкурс-фестивале хутшăнать. Акă пĕлтĕр Азербайджанри ташă фестивалĕнче пулса курнă. Кăçал вара «Калинка» ушкăнпа Крымра иртнĕ ташă уявĕнче пултарулăхне кăтартнă.

— Хамăр ансамбльпе тĕрлĕ хулана тухса çÿретпĕр. Унти илемлĕ вырăнсемпе, палăксемпе, музейсемпе паллашни асăмра яланлăхах юлать, — шăкăл-шăкăл калаçать чĕвĕлти сасăллă маттур.

Чун киленĕçне те ташăра тупнă Таня. Сцена çинче тĕрлĕ хускану тунă самантсенче пуринчен телейлĕрех туять. Çунат хушнăнах туять вăл ун пек чухне хăйне. Кăмăл-туйăм та çĕкленет, куракансем тăвăллăн алă çупни вара çав тери хавхалантарать. «Чи кăмăла каякан ташă мĕнли?» — тесе ыйтсан: «Тĕрлĕ халăх ташшипе савăнтаратпăр куракана: чăваш, вырăс, тутар... Пурте вĕсем интереслĕ. Уйрăмах мана удмурт халăх ташши килĕшет. Вĕсен наци костюмĕ те, хусканăвĕсем те хăйевĕрлĕхпе тыткăнлаççĕ, илĕртеççĕ», — кăмăллăн хуравларĕ Таня. «Чун киленĕçĕ вĕренĕве мĕнлерех витĕм кÿрет?» — пулчĕ тепĕр ыйту. «Чи малтанах хăвна çынсем умĕнче çирĕп тытма хăнăхатăн, сцена çине тухсан пăлханни те иртет. Ташăпа конкурссене тĕрлĕ хулана, çĕршыва тухса çÿренĕ май тавракурăм та аталанать, ку е вăл хула пирки нумайрах пĕлетĕн, унпа çывăхрах паллашатăн. Унсăр пуçне ташлани лайăх кăмăл-туйăм парнелет, çĕкленÿллĕ кăмăлпа вара вĕренÿ те çăмăллăн иртет», — хăпартланса вĕçлерĕ сăмахне хастарскер.

Нина ЦАРЫГИНА.

Муркаш районĕ,

Москакасси шкулĕ.