Канаш районĕнчи Шăхасанти культура çурчĕ çумĕнчи «Хозяюшка» клуба çÿрекенсем çу кунĕсенче те пĕрле пухăнма вăхăт тупаççĕ. Çĕртме-çурла уйăхĕсем — улма-çырла пиçсе çитнĕ тапхăр. Кил хуçи хĕрарăмĕсем сиплĕ çырларан тăрăшсах тутлă çимĕç хатĕрлеççĕ.
Вăрнар районĕнче аслă çулпа иртсе пынă май хирте тăрăшсах ĕçлекенсене асăрхарăмăр. Çĕньял Хапăсри Алексей Игнатьев фермер хуçалăхĕн ĕçченĕсем иккен. Кĕçех Алексей Яковлевич та машинăпа çитсе чарăнчĕ — акаçăсем валли кăнтăрлахи апат илсе килчĕ. Валерий Гаврилов, Сергей Краснов, Сергейпе Артемий Клементьевсем вăхăтлăха канма ларчĕç. Сергей Клементьев механизатор çĕр ĕçне ывăлне те явăçтарнă. «Унсăр кахалланса каяççĕ. Çăкăр мĕнрен пулнине пĕлмеççĕ. Ывăлсене пурне те ака-сухана илсе тухнă. Халĕ кĕçĕннине черет çитрĕ», — терĕ вăл.