Волейболистсем паттăрсене манмаççĕ

Волейболла выляса ÿсмен яшсемпе хĕрсем çук та пулĕ. «Эпир те ача чухне волейбол лапамĕнчен тухма пĕлместтĕмĕр. Стадионта мечĕке хăваласа чупас вырăнне икĕ юпаран сетка карса волейболла выляттăмăр», - тет «Куславккасем» ентешлĕхĕн ертÿçи, Чăваш наци конгресĕн «Сывă наци» комитечĕн председателĕ Юрий Зорин.

Çамрăклах спортпа туслашнăскер паянхи кун та сывă пурнăç йĕркине çирĕп тытса пырать вăл. Ăна час-час волейбол лапамĕнче курма пулать. Ыттисене те спорта явăçтарать. Çакна Чăваш Республикин тава тивĕçлĕ врачĕ хăйĕн тăван Куславкка тăрăхĕнче йĕркелесе ирттерекен ăмăртусем те çирĕплетеççĕ. Хăçан пуçланнă-ха çак йăла? «Иртнĕ ĕмĕрĕн 90-мĕш çулĕсенче тăван ялта - Энтри Пасарта - урамсем хушшинче пĕрремĕш турнир ирттертĕмĕр. Ăмăртăва 6 команда хутшăнчĕ. Çав тапхăртанпа пĕтĕм ял-йыш волейболпа «чирлерĕ». Куславкка тăрăхĕнче ветерансем те, шкул ачисем те, çамрăксем те, хĕрсем те волейболла выляççĕ. Хальхи вăхăтра Энтри Пасар шкулĕнчи хĕрсен команди чи вăйлă волейболистсем шутланаççĕ. Хамăр районта вĕсене çитекенни çук, чемпионатсенчен яланах сумлă парнесемпе таврăнаççĕ. Республикăра та пысăк ят-сума тивĕçнĕ пирĕн ентешсем», - пĕлтерчĕ Юрий Александрович. Эпир унпа, паллах, спортзалта тĕл пулса калаçрăмăр. Куславккари «Атăл» физкультурăпа спорт керменĕнче шăпах Афган вăрçин ветеранĕсен хушшинче волейбол турнирĕ пыратчĕ. Совет çарне Афганистанран илсе тухнăранпа кăçал 26 çул çитрĕ. Çак пулăма халалласа Куславккасем 2011 çулта ятарлă ăмăрту пуçарнă.

10 çула яхăн тăсăлнă вăрçăра миçе чăваш салтакĕ пуç хуман пулĕ, миçен киле сусăр таврăннă. «Афган вăрçине пирĕн районтан 60 яхăн яш хутшăннă. Анчах пĕри, Кинер каччи Борис Мишин, унтах выртса юлнă: кĕçĕн сержант 1987 çулхи сентябрĕн 18-мĕшĕнче тăшманпа çапăçса паттăррăн вилнĕ, - хыпарларĕ Афган вăрçин ветеранĕсен союзĕн районти уйрăмĕн ертÿçи Юрий Самсонов. - Хамăр ентеше тата çав вăрçă инкекне асра тытас тĕллевпе эпир, волейболла выляма юратакан афганецсем, турнир ирттерме шухăшларăмăр. Пĕрремĕш ăмăртăва Çĕрпÿсем, Вăрмарсем тата Çĕнĕ Шупашкарсем килчĕç. Иккĕмĕшне 8 команда хутшăнчĕ, тепрехинче - 12... Кăçал, акă, Тутарстанран та çитрĕç».

Ку турнир Юрий Зориншăн та пĕлтерĕшлĕ - Афган вăрçин «пăттине» унăн тăван Энтри Пасар шкулĕнчен вĕренсе тухнă 8 каччă тутанса курнă. Вĕсене тата республикăри 30 афганеца вăл нумаях пулмасть ялти шкула асăну каçне пухрĕ. Çавăн чухнех спортпа туслисем волейбол лапамĕнче тĕл пулчĕç. «Эпир, чĕррисем, хаяр вăрçăра паттăррăн çапăçса пуç хунисене ялан асра тытма тивĕç. Пирĕн салтаксем Тăван çĕршыва хÿтĕлесе хăйсене шеллемен. Вĕсен ячĕсем пирĕн чĕресенче упранĕç», - терĕ Юрий Александрович.

Йăлана кĕнĕ турнирта иртнĕ çулхи пекех Куславккасем çĕнтерчĕç. Финалта вĕсем «Вăтам Энĕш» командăна парăнтарса кубока тивĕçрĕç. Ăмăртура Вăрмарсем те хастар пулчĕç. Вĕсем те хăйсен районĕнче Афган вăрçин паттăрĕсене асăнса спортăн тĕрлĕ енĕпе темиçе турнир ирттернине палăртмалла. «Вăрмарсем Шăхальти Ю.Ивановпа, Пинерти В.Семеновпа, Кинчерти Р.Петровпа, Кĕтеснерти В.Питруковпа, Чупайри А.Лингапа мухтанаççĕ, вĕсен ятне асра тытаççĕ», - пĕлтерчĕ райадминистрацин физкультурăпа спорт секторĕн ертÿçи Валерий Ильин.

Чăн та, салтаксен паттăрлăхне нихăçан та манас марччĕ. Çултан-çул вăй илсе пыракан турнир пире, çамрăксене, вĕсем çинчен аса илтерсех тăрĕ.

Андрей МИХАЙЛОВ