Уявра пĕрле савăнар
Шупашкар çыннисемпе унăн хăнисем валли Çĕнĕ çул уявĕпе çыхăннă тĕлĕнмелле проектсем хатĕрленĕ. Республика тĕп хулинче часах Асамлăх академийĕ хăйĕн алăкне яр уçĕ, Çĕнĕ çул бульварĕ те хăнасене йышăнма хатĕр.
Республикăра Çĕнĕ çула мĕнле кăмăлпа кĕтсе илеççĕ-ха? Хĕллехи каникул вăхăтĕнче районсемпе тата хуласемпе паллашмашкăн ятарлă проект - «Чăваш Ене Умкăпа пĕрле тĕпчетпĕр» - хатĕрленĕ. Вăл Çĕнĕ Шупашкар хулине, Сĕнтĕрвăрри, Çĕрпÿ, Шупашкар тата Етĕрне районĕсене илсе çитерĕ.
Çитес çулхи кăрлачăн 3-мĕшĕнче Çĕнĕ çул кĕрекине Сĕнтĕрвăрри районĕ йыхравлĕ. Мероприятисем унти купсапа мещен тата хресчен кил-çурчĕн музейĕнче иртĕç. Вăрман Пилемĕчри Татьяна Ефимовăн халăх ремеслине аталантарас енĕпе ĕçлекен пултарулăх мастерскойĕнче хĕртнĕ тăмран сувенир тума, Нарат Чаккинчи Даньковсен «Сире кĕтекен çуртра» хуран кукли, пÿремеч пĕçерме вĕрентĕç. Шуршăлти СССР космонавт летчикĕ А.Г.Николаев ячĕллĕ Мемориал комплексĕнче тĕнче уçлăхĕн вăрттăнлăхĕпе паллаштарĕç.
Кăрлачăн 4-мĕшĕнче хăнасене Етĕрне районĕ йышăнĕ. Унти «Сурские зори» турист базинче лашапа ярăнма май пулĕ. Çунашкапа сăрт çинчен çил пек вĕçсе анни ачалăха аса илме пулăшĕ. Унсăр пуçне районăн ÿнерпе тавра пĕлÿ музейĕ, СССР халăх артисчĕн Н.Д.Мордвиновăн музей-çурчĕ те йышăнĕ. Хĕл Мучин Тури Ачакри резиденцийĕнче хатĕрленĕ «Хресченĕн хĕллехи йăпанăвĕсем» программа та кăсăклантарĕ.
Кăрлачăн 5-мĕшĕнче Шупашкар районĕнчи Станьяль этнокомплексĕнче хăнасене хапăл кĕтсе илĕç. Пултарулăх ярмăрккинче наци апачĕ, тетти-сувенирĕ, халăх коллективĕсен юрри-ташши савăнтарĕ.
Район центрĕнчи «Бичурин тата хальхи вăхăт» музейра «Непокорный монах» документлă фильм кăтартĕç.
Тепĕр кун - кăрлачăн 6-мĕшĕнче - тĕп мероприятисем Çĕнĕ Шупашкарти лаша спорчĕн шкулĕнче иртĕç. Унсăр пуçне «Химик» культура керменĕнче шăпăрлансем, çавăн пекех аслисем валли пуян программа хатĕрлеме палăртнă. Хула çыннисем уяв каçне ентешĕ те - «Любэ» ушкăнăн бас-гитарисчĕ Павел Усанов - хутшăнасса кĕтеççĕ.
Кăрлачăн 7-мĕшĕнче Çĕрпÿ районĕнчи хĕрарăмсен Тихвин Турă амăшĕн монастирĕнче Христос çуралнине мухтаса кĕлĕсем иртĕç.
Хулари тĕп лапамра «Простоквашинăри хĕл» мультфильмри сăнарсем хуçаланĕç. Вĕсемпе юнашар сăн ÿкерĕнме те пулĕ. Ачасемпе çамрăксем валли «Асамат» спорт шкулĕнче тĕрлĕ ăмăрту иртĕ.