Пĕлтĕр Амăшĕн кунĕ тĕлне Коопераци институчĕн специалистне Рената Магаринăна хамăр хаçатра сăмах патăмăр. Ун чухне ăна ачисене кун çути парнеленĕ куна аса илме ыйтнăччĕ. "Пепке кăшкăрса ярсан хам та çĕнĕрен çуралнă пекех", - тенĕччĕ 3 тĕпренчĕкне кун çути парнеленĕ хĕрарăм.
Этем çут тĕнчене килсенех - амăшĕн, кĕске вăхăтранах çемье ăшшине туйма тытăнать. Çут çанталăк саккунĕпе килĕшÿллĕн тĕнчери чи çывăх çынсем - пĕр çемьере пурăнакансем. Вĕсем тĕрĕс-тĕкел, ырă-сывă чухне темĕнле йывăрлăха та сирме пулать. Çемье йĕркеллĕ чухне пирĕн патшалăха та çăмăлрах килет.
Ĕнер Шупашкарти ача-пăча пултарулăх керменĕнче «Çулталăк çемйи-2013» республика конкурсĕн çĕнтерÿçисене чысларĕç. Кăçал ăмăртăва пурĕ 157 çемье хутшăннă, 28-ăн финала тухнă. Чи лайăххисене хавхалантарасси пирĕн республикăра 2004 çултанпа йăлана кĕнĕ. Конкурса 10 çултан кая мар пĕрле пурăнакан, икĕ е ытларах ывăл-хĕр ÿстерекен, обществăра хисеп çĕнсе илнĕ, сывă пурнăç йĕркине пăхăнакан мăшăрсем хутшăнаççĕ.
Чăвашла верси
Русская версия
