СЫВЛĂХШĂН ПАХА КВАС

Çак квас ăш хыпнине ирттернипе пĕрлех сывлăхшăн питĕ усăллă пулнипе палăрса тăрать. Ăна авалранпах хатĕрленĕ, унпа сиплевре анлă усă курнă.

Курăкран

Чи усăлли шутланать. Мĕнле ӳсен-тăранран хатĕрленине кура тĕрлĕ органпа тытăма сиплĕ витĕм кӳрет.

1 стакан сахăра 3 литр шыва ямалла, 1 чей кашăкĕ хăйма хушса пăтратмалла. Марля хутаçа тултарнă 1 стакан типĕ курăка /çӳле çĕкленесрен йывăр япала чиксе/ банка тĕпне антармалла.

Пӳлĕм температуринче 2 эрне лартмалла, çиеле пухăннă кăмăска сийе çийĕнчех иле-иле пăрахмалла. Холодильникре упрамалла. Кунне 3 хут апат умĕн çуршар стакан ĕçмелле.

Квасăн çурри кăна юлсан малтанхи калăпăшне çитерме сахăр сиропĕ /1 стакан шыва — 1-2 апат кашăкĕ сахăр/ хушмалла.

Кирлĕ курăксем:

  • нерв тытăмĕн, сывлав çулĕсен, вар-хырăм чирĕсем — матрӳшке /душица/, пĕтнĕк /мята/, чапăр /чабрец/;
  • юн тымарĕсен чирĕсем — ăншăрт курăкĕ /адонис/, эмел шур курăкĕ /шалфей/, лантăш, пӳрнеске курăкĕ /наперстянка/;
  • невралги, шăнăр хутлатни — шур тăрăллă хыт курăк /тысячелистник/, сарă кушак ури /бессмертник/;
  • пуç ыратни, вăй-хал чакни, шăнса пăсăлни — палан, мелисса, упа çырли /бузина/, клевер.

Пахча çимĕçрен

Вĕренĕ 2 литр шыва 4 апат кашăкĕ сахăр, ыраш çăкăрĕн хытти, шултра 1 е вĕтĕрех 2-3 пахча çимĕç вакласа ямалла. Савăта пусмапа витсе ăшă вырăнта 3 кун лартмалла. Унтан сăрăхтармалла. Кунне 2-3 хут апат умĕн 100-шер миллилитр ĕçмелле. Сивĕре упрамалла.

Кирлĕ пахча çимĕç:

  • витаминсен çитменлĕхĕ, куç чирĕсем — кишĕр;
  • гипертони, атеросклероз — хĕрлĕ кăшман;
  • витаминсен çитменлĕхĕ, язва чирĕн профилактики — купăста.

Асăрханăр! Пахча çимĕç квасĕ вар-хырăмăн кирек мĕнле чирĕсем, пӳре чирĕсем вĕрĕлсен юрамасть, ача кĕтекен тата кăкăр ĕмĕртекен хĕрарăмсен те ĕçмесен лайăхрах.

Улма-çырларан

Ăш хыпнине ирттерет, организма витаминсемпе тивĕçтерет. Начарланма пулăшать.

5 литр шыва сахăр /улма-çырла пылак пулсан — 1 стакан, йӳçĕ пулсан — 2 стакан/ ямалла, вĕретмелле. Сивĕнсен 1 литр сĕткен е çавăн чухлех нимĕрленĕ улма-çырла е малтанах ислетсе лартнă типĕтнĕ улма-çырла, 20 грамм çĕпре хушмалла. Ăшă вырăна 2 куна лартмалла. Унтан кĕленчесене ямалла. Сивĕре упрамалла.

Кирлĕ улма-çырла:

  • вар хытни, пĕвер чирĕсем, аппетит чакни — панулми;
  • юн тымарĕсен, ват хăмпин чирĕсем, ӳт тăртанни — пилеш;
  • варвитти, шăнса пăсăлни — груша;
  •  артрит, подагра, пӳре, пĕвер чирĕсем — чие;
  • атеросклероз, хырăмлăх сĕткенĕн йӳçеклĕхĕ пысăк чухнехи гастрит, хырăмлăх язви — хура хурлăхан;
  • чĕре чирĕсем — абрикос.

 

Комментари хушас

Image CAPTCHA
Введите символы, которые показаны на картинке.