Республикăн чăн пуянлăхĕ - ăста çынсем

Тухтăрсемпе педагогсем, артистсемпе художниксем, инженерсемпе чиновниксем - эрнекун Правительство çуртĕнче тĕрлĕ професси çыннисем пухăнчĕç. Сăлтавĕ те пĕлтерĕшлĕ - ЧР Пуçлăхĕн тивĕçĕсене вăхăтлăх пурнăçлакан Михаил Игнатьев ĕçре палăрнă 33 çынна Раççей Федерацийĕн тата Чăваш Республикин патшалăх наградисемпе чысларĕ.

...Çирĕпленнĕ йĕркепе пĕрлехи ĕçе - регион аталанăвне - пысăк тÿпе хывнă ентешĕмĕрсен ячĕпе Раççей тата Чăваш Республикин гимнĕсем янăрарĕç. Унтан республика Пуçлăхĕн тивĕçĕсене вăхăтлăх пурнăçлакан Михаил Игнатьев сăмах илчĕ:

- Пирĕн республика пултаруллă, чаплă, хăйсен ĕçне пĕлсе тăвакан тата тăван çĕре чунтан юратакан ырă çынсемпе пуян. Çакăн пек илемлĕ кун мана пысăк ăсталăх тата ĕçе юратни пĕр чăмăра пĕрлештерекен çынсене чыслама уйрăмах кăмăллă. Эсир куллен-кун ăнăçу туни Чăваш Ене малалла аталанма май парать. Шупашкар çуралнă куна тивĕçлĕ кăтартусемпе тата çутă шанăçпа кĕтсе илетпĕр.

Михаил Васильевич сăмахĕсене тĕслĕхсемпе çирĕплетнĕ май тĕп хула влаçĕ республика ертÿлĕхĕ пулăшнипе туса пыракан ĕç-хĕле пысăк хак пачĕ:

- 2011 çултанпа Шупашкарта çĕнĕ 15 микрорайон никĕсне янă, 16 садик çĕнĕрен тунă е реконструкциленĕ, пилĕк спорт керменĕпе комплекс, 10 бассейн уçнă, хулари 600 яхăн картише хăтлăлатнă. Тепĕр виçĕ çултан Шупашкарта юсаса çĕнетмен пĕр картиш те юлмĕ. Çак тата ытти ĕçе тĕп хулари кашни çемьен пурнăçне лайăхлатассишĕн тăватпăр.

Республикăн чăн пуянлăхĕ - çын. Çак сăмахсене Михаил Васильевич яланах калать. Чăнах та, Чăваш Ен çынни чунне парса ĕçлени, ăсталăхне куллен-кун ÿстерсе пыни, çĕнĕ çитĕнÿсем патне ăнтăлни тăван республикăна, тăван Шупашкара, тăван çĕре аталанма, чечекленме, пур енлĕн пуянланма пулăшать. Награда - çак çынсен ĕç-хĕлне хаклани кăна мар, вĕсене малалла ăнтăлма хистекен хăйнеевĕр туртăм та.

Акă нумай çул тÿрĕ кăмăлпа ĕçленĕшĕн, общество ĕçне хастар хутшăннăшăн Юрий Алимов РФ Президенчĕн Хисеп грамотине тивĕçрĕ. Юрий Николаевич электроэнергетика отраслĕнче 53 çул вăй хунă. Вăл ертсе пынипе хÿтĕлев тата авари хăрушлăхне сирекен автоматикăн /вĕсене хальхи вăхăтра "ЭКРА" ăслăлăхпа производство предприятийĕ туса кăларать/ мĕнпур микропроцессор хатĕрне туса кăларса производствăра усă курнă.

Михаил Васильевич А.Игнатьев ячĕллĕ Чăваш Республикин пĕрлештернĕ командине хатĕрлекен центрта ĕçлекен Геннадий Иванов тренера РФ Президенчĕн Тавĕпе чысларĕç. Йывăр атлетика енĕпе Геннадий Геннадьевич тĕнче класлă тăватă спорт мастерне, Раççей спорчĕн вунă мастерне вĕрентсе ÿстернĕ. Ун патĕнче ăсталăхне туптакан спортсменсем çĕршыв шайĕнчи ăмăртусенче пĕр хутчен çеç мар лайăх енчен палăрнă. Геннадий Геннадьевич Республика Пуçлăхĕн тивĕçĕсене вăхăтлăх пурнăçлакан Михаил Васильевича физкультурăна тата спорта аталантарма тăрăшнăшăн тав турĕ. Юлашки çулсенче Чăваш Енре спортпа туслашма мĕнпур услови пуррине 1-мĕш гимнази вĕрентекенĕ Юрий Сейфуллин та палăртрĕ.

Чăваш халăх художникĕн ятне илнĕ Владимир Нагорнов хăйне çапла пысăк чыс тунăшăн республика ертÿлĕхне чĕререн тав турĕ. "Яланах Тăван çĕршыв тата юратнă Чăваш Ен ырлăхĕшĕн ĕçленĕ, малашне те ĕçлĕп", - терĕ вăл.

В.БАГАДЕРОВА