Пурĕ - 45 медаль!

Чăваш спорчĕн историйĕнче кунашкалли пулнă-и, пулман-и - пирĕн сумлă ветерансем вара тĕлĕнтерчĕç: Челябинск хулинче иртнĕ çĕршыв чемпионатĕнчен медальсен пуххипе таврăнчĕç. 35 çултан иртнĕ çăмăл атлетсен ăмăртăвĕн пĕтĕмлетĕвĕпе ентешĕмĕрсен команди виççĕмĕш вырăн йышăннă.

Республика чысне Шупашкарти спорта юратакансен «Элара» клубĕн 33 хастарĕ хÿтĕленĕ. Вĕсем тĕрлĕ ăмăртура пурĕ 45 медаль çĕнсе илме пултарнă. Чи асли - 80-ри Александр Захаров вара 18-ти çамрăкран та ирттерет. Хăшпĕр тупăшăва хутшăнакансен йышĕ пысăк пулнă пулин те Александр Матвеевич тĕрлĕ дистанцире /5000 тата 1500 м/ чупса «ылтăнпа» «кĕмĕле» тивĕçнĕ. Тĕслĕхрен, 5000 метра парăнтармашкăн 70 яхăн арçын тухнă, пирĕн ветеран вара унта чи пултарулли пулнă. Сăмах май, йĕтре тĕртекенсен хушшинче - 51 çын, 200 метрлă дистанцире 62 çын вăй виçнĕ.

Чупас енĕпе пирĕн хĕрарăмсем те палăрнă. 60-ти Тамара Краснова 1500 тата 5000 метрлă дистанцисенче çĕнтерсе пухмача икĕ "ылтăнпа" пуянлатнă.

48 çулти Владимир Сапожников та командăна икĕ наградăпа савăнтарнă. Шупашкарти Олимп резервĕсен 1-мĕш спорт шкулĕн тренер-преподавателĕ Игорь Свинцов тăршшĕне тата çÿллĕшне сикекенсен секторĕнче пултарулăх кăтартнă. Вăл та «ылтăнпа» «кĕмĕллĕ» пулнă. Ытти тупăшура вара Николай Алексеев, Николай Иванов, Поликарп Ильин, Надежда Лаврентьева, Александр Маркин, Корнил Иванов, Игорь Никифоров, Светлана Егорова тĕрлĕ медаль çĕнсе илнĕ.

- Пирĕн ветерансем пурнăçран юласшăн мар. Вĕсем общество ĕçĕнче те хастар, спортпа та туслă, ĕçлеме те ÿркенмеççĕ. Харсăрскерсем республикăра йĕркелекен пĕр ăмăртуран та юлмаççĕ. Массăллă акцисем те вĕсемсĕр иртмеççĕ. Май пулсан ытти региона тухса çÿреççĕ. Ветерансен çитĕнĕвĕсемпе эпĕ питĕ кăмăллă. Малашне те çаплах пуласса шанас килет, - палăртать республикăри Ветерансен канашĕн ертÿçи Василий Шоркин.

Чăн та, ентешĕмĕрсене çулла «Олимп кунĕнче», кĕркунне «Нацисен кросĕнче», хĕлле «Йĕлтĕр йĕрĕ» тата ытти тĕрлĕ ăмăртура куратпăр. Вĕсем çамрăксемпе танах старта тухса хăйсен пултарулăхне кăтартаççĕ.

Сăмах май, çуркунне пирĕн ветерансем, Шупашкарти спорта юратакансен «Элара» клубĕн хастарĕсемех, Хусанта иртнĕ турниртан çĕнтерÿ кубокĕпе таврăннăччĕ. 9960 метрлă дистанцие Шупашкарти Игорь Никифоров /45 çула çитмен арçынсен ушкăнĕ/, Николай Иванов /А-55/, Петр Данилов /А-60/, Виталий Егоров /А-65/, Николай Гаврилов /А-79/ тата Тамара Краснова /Х-60/ пуринчен малтан вĕçлесе чемпион ятне тивĕçнĕ.

Маттур! Пултараççĕ! Паянхи яш-кĕрĕмпе хĕр-упраçшăн - пысăк тĕслĕх ку. Пирĕн, çамрăксен, вара вĕсенчен юлас марччĕ. Киревсĕр йăласенчен пăрăнса сывă пурнăç йĕркине суйласа илесчĕ, спортпа туслă пуласчĕ.

Андрей МИХАЙЛОВ