Сахалинтан Шупашкара – пĕрремĕш хут

Юпа уйăхĕн 2-5-мĕшĕсенче Шупашкарта Сахалин пукане театрĕн «Пысăк гастролĕ» иртет. Спектакльсем пуçланас умĕн театрта пресс-конференци пулчĕ. Мероприятие ЧР культура министрĕн çумĕ Георгий Богуславский, Чăваш патшалăх пукане театрĕн директорĕ Елизавета Абрамова, Сахалин пукане театрĕн илемлĕх ертӳçи Антонина Добролюбова тата Чăваш Республикин театр ĕçченĕсен союзĕн председателĕ Сергей Павлов хутшăнчĕç.

Нумаях пулмасть Чăваш патшалăх пукане театрĕн артисчĕсем те Сахалинта пулнăччĕ, ачасене те, çитĕннисене те кăсăклă спектакльсемпе паллаштарнăччĕ. Халĕ вара инçетри Сахалин утравĕнчен те пултарулăх ушкăнĕ Чăваш Ене килсе çитрĕ.

— Чăваш театрĕ – манăн юратнă театр. Вăл ӳсни, вырăнта тăмасăр малалла кайма туртăм пурри курăнать, тĕрлĕ эксперимента хатĕр. Пирĕн патра Сахалинта иртнĕ гастрольсем чăваш актерĕсем вăхăт расналăхĕ кӳрекен йывăрлăха пăхмасăрах паха спектакль лартма пултарнине кăтартрĕç. Çакă куракан мĕнле йышăннинченех паллă. Спектакльсем мĕн тери килĕшни çинчен пирĕн хуралçă чи нумай илтекенни пулчĕ — ачасем шухăш-кăмăлне унпа пайланă, — терĕ Сахалин пукане театрĕн илемлĕх ертӳçи Антонина Добролюбова.

Антонина Александровна палăртнă тăрăх, артистсене хĕвеллĕ Чăваш Ене, илемлĕ хулана илсе килсе кăтартас шухăш унăн тахçанах пулнă. Ĕмĕтленни тинех пурнăçланнă. Вĕсене Чăваш патшалăх пукане театрĕ мĕнле кĕтсе илни вара пуринчен те ытларах тĕлĕнтернĕ, савăнăç куççулĕ кăларнă. Наци тумĕ, юрри-ташши - çакă хăнасене йăлтах тыткăнланă-мĕн.

— Чăвашсем Сахалинта та сахал мар. Пирĕн тĕп бухгалтер та чăваш, — терĕ Антонина Александровна йăл кулса. Çапла ыйту-хурав мелĕпе ирттернĕ тĕлпулу вăхăтĕнче икĕ региона пĕрлештерекен самант та сахал мар тĕл пулчĕ.

Палăртмалла: Сахалин пукане театрĕ – утрав çинчи регионăн тата Раççейĕн Инçет Хĕвел тухăçĕн культура бренчĕсенчен пĕри. Репертурти 50 ытла спектакль çĕршыв тата тĕнче шайĕнчи конкурссенче çĕнтернĕ. Артистсем Чăваш Ене виçĕ спектакль илсе килнĕ: «Золотой Цыпленок» /5 çултан аслăрах куракансем валли/, «Убить Бобрыкина» /14 çултан аслăрах куракансем валли/ тата «Семья Красношапкиных» /6 çултан аслăрах куракансем валли/. Вĕсене «Пушкин карттипе» курма пулать.

ЧР культура министрĕн çумĕ Георгий Богуславский палăртнă пек, чăнах та, пĕр-пĕрин ĕçĕсемпе паллашни театрсене вăйлатма пулăшать, куракансене те театра ытларах илĕртет.

www.hypar.ru