Малтан лицензи илмелле

Пурăнмалли çурт-йĕрпе коммуналлă хуçалăхра реформа пуçланни темиçе çул, çапах ку тытăмра йĕрки çукрах пулас. Çакна судра пăхса тухнă хăшпĕр ĕçсем çирĕплетеççĕ.

Çĕнĕ Шупашкар хула судĕнче «Новэк» управляющи компанийĕн ĕçне-хĕлне тишкернĕ. Тĕрĕссипе коллектив çинчен сăмах пымасть кунта, пĕтĕм шăв-шав унăн ертÿçи пулнă Ющенкăпа çыхăннă. Компани пăхса тăракан çуртсене ăшăпа тивĕçтернĕ предприятисемпе татăласси питĕ япăхса кайнă. Шăпах вăл директорта ларнă çулсенче.

Пĕтĕмĕшле парăм 150 млн тенкĕрен иртнĕ. Çавна май çуртсене ăшă пама пăрахас ыйту тухса тăнă. Хваттер укçи чиперех тÿлесе тăракан çынсем мĕнпе айăпа кĕнĕ-ши?

«Коммунальные технологии» юлташлăхăн тĕп директорĕ пулнă Лучинкина вара виçĕ преступленишĕн /укçа-тенке тĕлли-паллисĕр сапаланăшăн/ айăплаççĕ. Директор хăйĕн тăванĕсем е çывăх юлташĕсем ертсе пынă фирмăсемпе автотранспорт хатĕрĕсене тара парасси çинчен килĕшÿ тунă. Пурлăха сутассипе тата арендăна парассипе çыхăннă килĕшÿсенче хаксене юриех пысăклатса кăтартнă. Çак тапхăрта уссăр тăкаксем 64 млн тенкĕрен иртнĕ.

Çĕмĕрлери коммуналлă хуçалăх тытăмĕнчи çитменлĕхсем çинчен хаçатсем чылай çырчĕç. Тĕрĕслев вăхăтĕнче çĕнĕрен çĕнĕ йĕркесĕрлĕх çиеле тухать. Акă «ЖКУ» юлташлăх ертÿçин С.Мироновăн темиçе самантпа явап тытма тивĕ. Предприятие юридици пулăшăвĕ панăшăн тата ăшă мĕн чухлĕ пĕтернине палăртма пулăшнăшăн вăл укçа ытлашшипех тÿленĕ: 7 млн тенкĕ. Хăйĕн кĕсйинчен мар-çке. Кунсăр пуçне директор «Центр» строительство компанийĕн тата «Тепло-Сервис» юлташлăхăн пурлăхне вăрланине çирĕплетнĕ.

Çак ĕçе пăхса тухса Çĕмĕрле район сучĕ ăна 5 çул та 6 уйăхлăха ирĕк прависĕр хăварма, унран пĕр млн тенкĕ шыраса илме йышăннă.

ЧР пурăнмалли çурт-йĕрĕн тĕп инспекторĕн ĕçне туса пыракан Виктор Кочетков каланă тăрăх - ЖКХ тытăмĕнчи фирмăсене лицензилени саккуна пăхăнманнисенчен хăтăлма май парĕ. Коммуналлă хуçалăхри компанисене тĕрĕслесе лицензи парас ĕç 2015 çулхи майăн 1-мĕшĕччен пырать. Специалистсен шучĕпе, çынсен ыйтăвне кирлĕ пек тивĕçтермен фирмăсен 20 проценчĕ тĕрĕслев витĕр тухаймĕ.

Григорий СЛАВИН