Канатпăр, савăнатпăр!

Аня Аблогина ытти çулсенчи пекех кăçал та лагерьте канчĕ. Ĕнтĕ паян ялта вăл. Иртнĕ вăхăта тепĕр чухне ăшă кăмăлпа аса илет, туслашнă-паллашнă ачасемпе Интернет урлă çыхăнать.

— Унти пурнăç питĕ килĕшет мана, çĕнĕ туссем пе паллашатăп, — тет Шăмăршă районĕнчи Карапай Шăмăршă шкулĕн саккăрмĕш класне кайма хатĕрленекен хĕрача. — Халĕ вара аннене кашни кунах пулăшатăп. Пахчара та чылай тăрăшрăмăр, хĕллене компот-варени, кăмпа-çырла та çителĕклĕ хатĕрлерĕмĕр.

Хĕрача тепĕр чухне юратнă шкулпа педагогсене, пĕрле вĕренекенсене аса илсе тунсăхлать.

— Вĕренме килĕшнĕренех пур предметпа та «5» паллăсемпе çеç ĕлкĕрсе пыратăп. Çапах та чи юратни — алгебра. Задача, уравнени шутлама кăмăлланăран паян та алла ручка тытатăп. Çапах та каникулта ирĕклĕ-çке эпĕ. Вулама килĕштеретĕп, уйрăмах вăрçă çинчен. Фронтри пурнăç мăн-мăн асаттесемпе кукаçисен вăрăм пулнă. Сехетпе те, кунпа та шутласа кăларма хĕнтерех. Тăван çĕршывăн телейлĕ кун-çулĕшĕн çапăçса нумай пархатарлă ĕç тунă. Вĕсем — улăп паттăрсем! Вĕсемех мана тата ытти ачана хĕвеллĕ кун парнеленĕ. Çавăнпа, авă, каникула хаваслă та ăнăçлă ирттеретпĕр. Канатпăр та, савăнатпăр. Тавах вĕсене мирлĕ пурнăçшăн!

Элиза ВАЛАНС.

Шăмăршă районĕ,

Карапай Шăмăршă.

 

Элиза ВАЛАНС

Комментари хушас

Image CAPTCHA
Введите символы, которые показаны на картинке.