Тăван Атăл

Пуйăс тарăн ыйхăран вăраннă улăп евĕр туртăнса илчĕ те хашлатса майĕпен вырăнтан тапранчĕ. Пĕр хушă такам тытса чарасран шикленнĕн йăпшăнса пычĕ, кайран вара шăна-пăванран таракан выльăх пек ĕрĕхсе малалла ыткăнчĕ. Çĕрпе пĕлĕт пĕрлешекен тĕлте телей тупасса шанчĕ тейĕн.
Хĕрÿ хĕвел питтинче хăватпа тулакан Ташкент хыçа тăрса юлчĕ. Ырми-канми пуйăсăн юлашки чарăнăвĕ — сулхăн Хусан — çывхарнăçемĕн çывхарать.