Харпăрлăхран тупăш килет

Чăваш Ен пурлăхне приватизацилес ĕç пĕлтĕр мĕнле пынă тата 2014 çулта малалла тăсăлĕ-ши?

Н.ГУРЬЕВА.

Шупашкар районĕ.

2013 çулта ăна ăнăçлă сутнăран ЧР хыснине 559 млн тенкĕ - тупăш виçĕм çулхинчен 3,4 хут нумайрах - кĕчĕ. Харпăрлăха панисенчен йышĕнче: "Чăваш Ен" издательство-полиграфи комплексĕ", "Атăл" хăна çурчĕ" АУОсем, вăтам тата пĕчĕк предпринимательлĕхĕн 2 объекчĕ, АУОсен акцийĕсен 7 пакечĕ. Пĕлтĕр приватизацилеме палăртнă 24 объектран 17-шĕн акцийĕсене сутнă: плана 71% тултарнă. ЧР пурлăхне кăçал харпăрлăха памалли тĕллевпе килĕшÿллĕн патшалăхăн "Çĕрпÿ ветсанутильзавочĕ" унитари предприятине ăна модернизацилеме инвестора явăçтарас тĕллевпе сутăпăр. "Çĕнĕ Шупашкарти 97-мĕш аптека", "142-мĕш аптека", "Урмарская" кайăк-кĕшĕк фабрики", "Чăвашçăкăрпродукчĕ" АУОсем хăйсен акцийĕсене пурне те, "Николаевский" суту-илÿ комплексĕ" АУО - 29,35%, "Чăвашметалл" АУО - 20%, "АКБ"Чăвашкредитпромбанк" - 38,13%, "Санатория "Чувашия" - 50%, "Маслосырбаза "Чувашская" 22,12% сутать. Çавăн пекех куçман пурлăхăн 12 объектне аукцион ирттерсе харпăрлăха парăпăр.

Ирина УСТЕНКО,

ЧР пурлăх тата çĕр хутшăнăвĕсен министрĕн тивĕçне вăхăтлăха пурнăçлакан.