Çÿллĕрех, хăвăртрах, вăйлăрах!

Чăваш Ен Пуçлăхĕн кубокĕшĕн чи маттуррисем тупăшрĕç

Çак кунсенче çăмăл атлетикăна юратакансем Çĕнĕ Шупашкарти Олимп резервĕсен 3-мĕш спорт шкулĕн çĕнĕ манежне пухăнчĕç. Унта Чăваш Ен Пуçлăхĕн кубокне çĕнсе илессишĕн Пĕтĕм Раççейри ăмăрту тата федерацин Атăлçи округĕн чемпионачĕ иртрĕ.

Чăваш Ене çĕршывăн тĕрлĕ кĕтесĕнчен 700 яхăн атлет килсе çитрĕ. Савăнăçлă парадра спортсменсемпе вĕсен тренерĕсене ЧР Правительствин председателĕ Иван Моторин, Пĕтĕм Раççейри çăмăл атлетика федерацийĕн тĕп секретарĕ Михаил Бутов, Олимп чемпионки, ЧР Патшалăх Канашĕн депутачĕ Елена Николаева, СССР тава тивĕçлĕ тренерĕ Михаил Кузнецов саламларĕç.

«Чăваш Ен Пуçлăхĕн кубокĕ - Пĕтĕм Раççейри спорт календарьне кĕнĕ тĕп ăмăртусенчен пĕри. Турнира çулсерен çамрăк вун-вун атлет, паллă спортсменсем хутшăнаççĕ. Малашне те вăл хăйĕн сумне çухатмастех. Чăваш Республикинче çăмăл атлетика питĕ анлă сарăлнă, кунта кашни виççĕмĕш çын спортпа туслă. Республикăра тĕнче ăмăртăвĕсене ирттересси те йăлана кĕнĕ. Шупашкар кăçалхи июнĕн 20-21-мĕшĕсенче тепĕр пысăк пĕлтерĕшлĕ турнира - Европа чемпионатне - йышăнĕ. Унта чи вăйлă 12 команда вăй виçĕ. Ăна çÿллĕ шайра йĕркелессе шанатăп», - палăртрĕ Михаил Бутов.

Çĕнĕ Шупашкар ăшшăн кĕтсе илнĕ сумлă хăнасен йышĕнче: РФ тава тивĕçлĕ тренерĕ Сергей Клюгинпа унăн вĕренекенĕсем - çÿллĕшне сикес енĕпе тĕнчипе палăрнă Олимп чемпионĕ Иван Ухов, Олимпиадăн бронза призерĕ Светлана Школина. Вĕсем пирĕн республикăра пĕрремĕш хут мар, çавăнпа Чăваш Ене килме яланах хавас: «Кунта пире кашнинчех ăшшăн кĕтсе илеççĕ, çыннисем ырă чунлă та тарават. Куракансем хавхалантарни яланах вăй-хал хушать. Паян та кăмăл-туйăм çĕкленÿллĕ, кунашкал керменте çитĕнÿ хыççăн çитĕнÿ тăвас килет. Ку ăмăртура эпир хамăрăн кăçалхи сезона пуçлатпăр, паянхи кăтартусем малашлăха çул уçаççĕ. Тĕрĕссипе, Чăваш Енре мана яланах ăнать», - терĕ Олимп чемпионĕ Иван Ухов. Вăл, чăн та, куракансене хăйĕн ăсталăхĕпе тĕлĕнтерсе иртнĕ çулхи пекех ăмăртăвăн тĕп парнине тивĕçрĕ. Светлана Школинăшăн Çĕнĕ Шупашкарти турнир 2013 çултанпа пĕрремĕш старт шутланать: суранланнă хыççăн пĕр вăхăт ăмăртусене хутшăнайман вăл. «Паян эпĕ çĕнтерме, çĕнĕрен те çĕнĕ çитĕнÿсем тума хатĕр. Плансем те пысăк, малашлăхра - пĕлтерĕшлĕ турнирсем», - пĕлтерчĕ тĕнче чемпионки. Спорта таврăннăшăн хĕпĕртенĕскер çÿллĕшне 1,95 метр сиксе хĕрсен ушкăнĕнче ылтăн медаль çĕнсе илме пултарчĕ. Ку хальхи вăхăтра тĕнчери чи лайăх кăтарту пулнине пĕлтĕмĕр. Тĕрĕссипе, Иван Уховăн кăтартăвĕ те /вăл 2,30 метр сикрĕ/ тĕнчен топ-листĕнче - иккĕмĕш вырăнта. Сăмах май, Сергей Клюгин тренер патĕнче чылай спортсмен ăсталăха тупать. 2000 çулхи Олимпиада паттăрĕ çулталăк каялла пирĕн ентеше - Шупашкар пикине Екатерина Федотовăна - хăйĕн хÿттине илнĕ. Шел те, çамрăк спортсменка ку ăмăртура мала тухаймарĕ.

Чăваш Ен Пуçлăхĕн кубокĕ - çĕршыври тата республикăри чи пĕлтерĕшлĕ ăмăртусенчен пĕри. 2013 çултанпа старта «элита» тата «ылтăн резерв» ушкăна кĕрекен атлетсем /20 çула çитмен юниорсем/ тухаççĕ. Кăçал вĕсем медальсен 32 комплектне çĕнсе илессишĕн вăй виçрĕç. Яланхи пекех спортсменсем хăвăрт утас, чăрмавсем урлă чупас, йĕтре тĕртес, тăршшĕне тата çÿллĕшне сикес, 200, 800, 3000 метрлă дистанцисене парăнтарас енĕпе тупăшрĕç. Турнирта Чăваш Ен чысне пирĕн спортсменсем те тивĕçлĕн хÿтĕлерĕç. Тĕслĕхрен, федерацин Атăлçи округĕн чемпионачĕн пĕрремĕш кунĕнче вĕсем 20 медальпе пуянлатрĕç пухмача. Алена Храмова, Кристина Михайлова, Лилия Степанова, Эдик Хайбуллин /хăвăрт утасси/, Елена Иванова тата Марина Сизова /60 м/ чи лайăх кăтартусемпе палăрчĕç.

Чăваш Ен Пуçлăхĕн ятарлă кубокне çĕнсе илессишĕн те чылаййăн вăй виçрĕç. Акă, йĕтре тĕртекенсен секторĕнче Тутарстанпа хамăр республика пикисене кăна куртăмăр. Тĕрĕссипе, пирĕннисем пуринчен вăйлăрах пулчĕç. Çĕнĕ Шупашкарти Евгения Смирнова иртнĕ çулхи кăтартăвне çĕнетсе пĕрремĕш вырăн йышăнчĕ, унăн тусĕ Марина Максимова пьедесталăн иккĕмĕш картлашки çине хăпарчĕ. 2013 çулта «Хыпар» Издательство çурчĕ Иван Яковлевăн 165 çулхи юбилейне, Николай Никольский çуралнăранпа 136 çул çитнине халалласа «Кăнна Кушки - Купăрля» маршрутпа ирттернĕ çăмăл атлетика чупăвне хутшăннă маттур хĕр Вера Васильева 800 метрлă дистанцие иккĕмĕш вĕçлесен уйрăмах хĕпĕртерĕм. 3000 метра чупакансен тупăшăвне те чăвашсем нумайăн тухрĕç, унта çĕршыв чемпионкине Елена Наговицынăна уйрăмах ăнчĕ - иккĕмĕш вырăн. Яшсемпе хĕрсен ушкăнĕнче Сергей Петров, Сергей Спиридонов тата Виктория Морозова ылтăнпа кĕмĕл медальсене тивĕçрĕç. Шалчапа сикекенсен секторĕнче вара пурте Европа чемпионкине Анжелика Сидоровăна куç илмесĕр сăнарĕç. Чăваш Ен спортсменки Европа чемпионачĕн бронза призерĕпе Ангелина Красновăпа тупăшрĕ. Анчах Мускав атлечĕ унран маттуртарах пулчĕ. Пĕтĕмĕшле илсен, пирĕннисем Чăваш Ен Пуçлăхĕн кубокĕнче тĕрлĕ 8 медаль çĕнсе илчĕç.

Андрей МИХАЙЛОВ