Комментари хушас

Чăваш кĕнеке издательствин «Из опыта народных мастеров» ярăмĕпе Сербире паллаштарнă. Раççей кĕнеке издателĕсен ассоциацийĕн делегацийĕ Белградра иртнĕ Пĕтĕм тĕнчери 59-мĕш кĕнеке куравне хутшăннă. Сумлă йышра Чăваш кĕнеке издательствин директорĕ Валерий Комиссаров та пулнă.

Чăваш Ен издательствин кĕнекисемпе куравăн пĕрремĕш кунĕнчех кăсăкланма пуçланă. «Çавра сĕтелте» те вĕсем пирки калаçу пуçарнă. Белградри Раççей ăслăлăх тата культура центрĕнче /Вырăс çурчĕ/ вырăнти писательсем, университет преподавателĕсемпе студенчĕсем тĕлĕнтернĕ. Вĕсем пурте вырăс литературине аван пĕлеççĕ иккен, наци писателĕсемпе поэчĕсен пултарулăхĕпе те кăсăкланаççĕ. Çавăнпах Г.Айхин «Собрания сочинений» томĕсене кăмăллăн тишкернĕ, Петĕр Хусанкай çинчен аса илсе калаçнă. «Чувашская Республика. Приглашение к сотрудничеству» альбома алăран алла ярсах пăхнă. Чылайăшĕ Чăваш Ен пирки те пĕлет, Шупашкарта пурăнакан ентешĕсем те сахал мар. Сербсем экономикăн тĕрлĕ отраслĕнче Чăваш Республикипе тачă çыхăну тытма хатĕррине пĕлтернĕ. Вырăс çурчĕн вĕрентÿ программисен директорĕ Илья Тяпкин Чăваш кĕнеке издательствин çĕнĕ кĕнекисемпе хăйсен сайтĕнче паллаштарма сĕннĕ.

Экономикăри кăткăс лару-тăрăва пăхмасăр Сербири ĕçтешсем кĕнеке кăларас ĕçе пысăка хураççĕ. Уйрăмах ача-пăча литературине ытларах кун çути кăтартма тăрăшаççĕ. Белградри куравра çамрăк вулакан йышли ахальтен мар пулĕ ĕнтĕ. Малашлăхра, ахăртнех, Чăваш кĕнеке издательствин тематика планĕнче Серби писателĕсен ачасем валли çырнă хайлавĕсен чăвашла ячĕсем пулĕç. Чăваш юмахĕсемпе сăввисене те ÿлĕмрен сербсем юратса вулĕç.

Валерий Комиссаров палăртнă тăрăх - ĕçтешсемпе хутшăнни çĕнĕ шухăшсем çуратать, хăвăн ĕçне çĕнĕлле хаклама май парать. Тĕслĕхрен, «Белый город» издательствăпа ача-пăча кĕнекисене вырăсларан чăвашла, чăвашларан вырăсла куçарма калаçса татăлнă. «Молодая гвардия» издательство /унта «Жизнь замечательных людей» ярăм пичетленет/ директорĕн заместителĕ Роман Косыгин Чăваш кĕнеке издательствин «Замечательные люди Чувашии» ярăм тĕплĕ кăларăм пулнине палăртнă. Унпа калаçнă май паллă çынсене халалланă пĕрлехи проект хатĕрлес шухăш çуралнă.

Издательствăшăн курăмлă тепĕр пулăм вăл - октябрĕн 28-мĕшĕнче Балкан регионĕнчи чи пысăк кĕнеке мероприятийĕнче иртнĕ «Из опыта народных мастеров» ярăмăн презентацийĕ. Валерий Комиссаров каланă тăрăх - чăваш ăстисем, художникĕсемпе тĕпчевçисем халăх йăли-йĕркине упраса хăварас, ят-сумне ÿстерес тĕлĕшпе нумай тăрăшаççĕ. Çак ĕçре издательствăн тÿпи те пысăк. Уйрăмах паллă кăларăм - «Из опыта народных мастеров» кĕнеке-альбом ярăмĕ. Ăна 2006 çулта никĕсленĕ. Хальлĕхе ултă кĕнеке тухнă. Вĕсем тĕрлĕ шайри куравсемпе конкурссен наградине тивĕçнĕ.

Палăртса хăварар: Белградра иртнĕ Пĕтĕм тĕнчери кĕнеке ярмăркки - Балканри чи пысăк кĕнеке форумĕ. Çулсерен тĕнчери 25 ытла çĕршыври пине яхăн издатель хăйсен чи лайăх кĕнекисемпе паллаштарать. Курав теми кĕнеке кăларас ĕç-хĕлĕн тĕрлĕ тытăмне - хут, электрон, аудио кĕнекесене кун çути кăтартасси, мультимедиа т.ыт.те - çутатать.

Надежда ОСИПОВА