Комментари хушас

Чăваш патшалăх пукане театрĕ В.Синкевичăн «Гадкий утенок» спектаклĕпе 70-мĕш сезона уçрĕ.

Çак кун театрта çамрăк куракансене тата вĕсен ашшĕ-амăшне пурте юратакан юмахсенчи сăнарсем - Хоттабыч старик, Мальвина, Буратино, Яга карчăк, Леопольд кушак, шăши, мыскараçăсемпе, путишле çынсем - кĕтсе илчĕç. Вĕсем ачасене выляттарчĕç, савăнтарчĕç, юмахсене мĕнле пĕлнине тĕрĕслерĕç. Уяв программи вĕçленнĕ хыççăн театрăн илемлĕх ертÿçи, Чăваш Республикин тава тивĕçлĕ артисчĕ Юрий Филиппов пурне те спектакль курма йыхравларĕ.

Юбилейлă сезон кăсăклă пуласси иккĕлентермест. Çулталăк тăршшĕпех артистсем пĕчĕккисене çĕнĕ юмахсемпе савăнтарĕç. Аслăрах ÿсĕмрисем валли театр классика, хальхи вăхăтри драматурги, чăваш авторĕсен хайлавĕсене сцена çине кăларма хатĕрленет. Тăван çĕр-шывăн Аслă вăрçинче çĕнтернĕренпе 70 çул çитнине халалласа коллектив вăрçă темипе çырнă «Молодое поколение о Великой Победе» ĕçпе сцена çине тухасшăн. Спектакль никĕсĕнче - 1943 çулта Сталинградшăн пынă çапăçура пуç хунă чăваш хĕрĕ Нина Капитонова санитаркăн кун-çулĕ.

Пукане театрĕ тĕллевлĕ проектсемпе те ĕçлесшĕн. Уйрăмах курăмлисем - социаллă пĕлтерĕшлисем, сусăрсемпе хавшак сывлăхлисене халалланисем. Грант çĕнсе илнĕ проектпа - ыттисенчен уйрăлса тăракан куракан валли йĕркеленĕ Пĕтĕм тĕнчери III «Пирĕн пĕрешкел пулмалла мар» фестивальпе - сезона вĕçлеме палăртнă.

Коллектив ял çыннисем пирки те манмасть. Артистсем республикăри район центрĕсемпе ялсенче çĕнĕ ĕçсене тата маларахри çулсенче сцена çине тухнă спектакльсене кăтартĕç. Кăçалхи сезонта артистсем Шупашкар шкулĕсен вĕрентекенĕсен ушкăнĕ пуçарнипе йĕркеленĕ «Çамрăк театрал шкулĕпе» тачă çыхăнса ĕçлесшĕн.

2015 çулхи чи паллă пулăм вăл - Пукане театрĕн юбилейĕ. Ака уйăхĕн 15-мĕшĕнче коллектива саламлама Раççей тата ют çĕр-шыв артисчĕсем Чăваш Ене килсе çитĕç.

Çĕнĕ сезонта кĕтменлĕхсемпе ятарлă акцисем нумай пулĕç. Вĕсенчен пĕринпе уяврах куракана тĕлĕнтерчĕç те ĕнтĕ: пĕчĕккине те, пысăккине те пĕр спектакле тÿлевсĕр кĕме билет пачĕç.

70-мĕш сезон уçăлчĕ. Ваттине те, вĕттине те «чĕрĕ» пуканесемпе тĕлĕнтермĕш юмахсен тĕнчи йыхравлать!

И.СЕРГЕЕВА